واشنگٹن :۔شام میں اسرائیل کی جانب سے حملے کے بعد ایک بار پھر ماحول کشیدہ ہو گیا تھا مگر دونوں فریقوں کے درمیان صلح پر اتفاق کے بعد چھڑپیں بند ہوگئی ہیں اور حالات معمول کی طرف لوٹ رہے ہیں ۔دریں اثنا اس بات کی تصدیق کرتے ہوئے امریکی وزیر خارجہ مارکو روبیو نے کہا ہے کہ شام میں لڑنے والے فریقین کا جھڑپیں ختم کرنے پر اتفاق ہوا ہے۔اپنے بیان میں انہوں نے کہا کہ شام میں لڑنے والے مختلف گروپوں سے رابطہ کیا ہے، مخصوص اقدامات پر اتفاق کرلیا گیا ہے۔مارکو روبیو کا کہنا ہے کہ یہ اقدامات آج شام میں خوفناک صورتحال کو ختم کردیں گے، تمام شامی فریقین کو اپنے وعدوں پر عمل کرنا ہوگا۔واضح رہے کہ شام میں بدو قبیلے کے ہاتھوں دروز قبیلے کے تاجر کے اغواء سے شروع ہوئے فسادات فرقہ وارانہ شکل اختیار کر گئے ہیں، جہاں جھڑپوں میں ہلاکتوں کی تعداد 203 ہو گئی ہیں۔دروز کے اکثریتی شہر سویدا میں جاری لڑائی میں شامی فوج دروز قبائل کو نشانہ بنا رہی ہے۔سویدا میں شدید لڑائی کے بعد اسرائیلی فوج نے شام کے دارالحکومت دمشق میں اہم مقامات پر حملہ کیا۔اسرائیلی فضائیہ نے شام کے دارالحکومت دمشق پر حملہ کیا، جس میں صدارتی محل اور وزارتِ دفاع کے قریب بم باری کی گئی۔
