پاکستان میں وزیر اعظم شہباز شریف کی حکومت نے انسداد دہشت گردی ترمیمی بل پاس کر دیا ہے۔ اس بل کے تحت فوج اور سیکورٹی ایجنسیوں کو یہ اختیار مل گیا ہے کہ وہ کسی بھی شخص کو 3 ماہ تک بغیر مقدمہ چلائے حراست میں رکھ سکتی ہے۔اس بل کی منظوری کے بعد ناقدین کا کہنا ہے کہ یہ قدم سیدھے طور پر پاکستان کو از سر نو تاناشاہی کی طرف دھکیل رہا ہے اور موجودہ آرمی چیف جنرل عاصم منیر کا راستہ جنرل مشرف جیسا بنا رہا ہے۔ پاکستان تحریک انصاف کے چیئرمین بیرسٹر گوہر علی خان نے اس قانون کو حقوق انسانی پر حملہ قرار دیا ہے۔ ان کا کہنا ہے کہ صرف شبہ کی بنیاد پر کسی کو 3 ماہ تک جیل میں ڈالنا اور عدالت میں پیش کیے بغیر قید رکھنا جمہوریت نہیں بلکہ تاناشاہی ہے۔ حقوق انسانی کارکنان کا اس معاملے میں صاف کہنا ہے کہ اس قانون کا استعمال دراصل دہشت گردی کے خلاف نہیں، بلکہ حکومت کے مخالفین اور عدم اتفاق رکھنے والوں کو دبانے کے لیے کیا جائے گا۔دوسری طرف وزیر قانون اعظم نذیر تارڑ کا کہنا ہے کہ یہ قانون صرف مخصوص حالات میں استعمال ہوگا۔ ان کے مطابق گرفتاری کی ٹھوس وجہ ضروری ہے۔ گرفتار شخص کو 24 گھنٹے کے اندر مجسٹریٹ کے سامنے پیش کیا جائے گا۔ یہ التزام ہمیشہ کے لیے نہیں، بلکہ محدود وقت کے لیے نافذ کیا گیا ہے۔ اس وضاحت کے باوجود حقوق انسانی تنظیمیں آگ بگولہ ہیں، اور سوال کر رہے ہیں کہ پاکستان جیسے ملک میں، جہاں فوج اور سیکورٹی ایجنسیوں کا رویہ ہمیشہ حاوی رہا ہے، کیا وہاں فوج ان سبھی شرائط پر عمل کرے گی؟
جہاں تک ’انسداد دہشت گردی ترمیمی بل‘ کا سوال ہے، نئی ترامیم پرانے ’انسداد دہشت گردی ایکٹ 2014‘ کے اس التزام کو پھر سے نافذ کرتا ہے جسے 2016 میں ختم کر دیا گیا تھا۔ اس التزام کے تحت کسی بھی شخص کو شبہ یا انٹلیجنس رپورٹ کی بنیاد پر احتیاطی حراست، یعنی پہلے سے ہی پکڑ کر 3 ماہ تک رکھا جا سکتا ہے۔ اس کے بعد معاملے کی جانچ ایک جوائنٹ انٹیروگیشن ٹیم (جے آئی ٹی) کرے گی، جس میں پولیس، خفیہ ایجنسیاں اور فوج کے افسران شامل ہوں گے۔ خاص بات یہ ہے کہ یہ التزام 3 سال تک نافذ رہے گا اور پھر پارلیمنٹ چاہے تو اسے مزید آگے بھی بڑھا سکتی ہے۔
واضح رہے کہ 1999 میں پرویز مشرف نے فوجی تختہ پلٹ کر نواز شریف کی منتخب حکومت کو گرا دیا تھا۔ انھوں نے آئین کو معطل کر ایمرجنسی نافذ کیا۔ فوجی طاقت کے دم پر پالیسیاں چلائیں اور اپوزیشن کو دبایا۔ بعد میں سپریم کورٹ نے ان کے قدم کو غیر قانونی بتایا اور انھیں ’ہائی ٹریزن‘ (غداری) کا قصوروار ٹھہرایا۔ ظاہر پرویز مشرف نے سیدھے طور پر جمہوری نظام کو توڑ کر تاناشاہی کا راستہ اختیار کیا۔ نئے حالات بھی کچھ ایسے ہی بن رہے ہیں۔ عاصم منیر اس وقت پاکستان کی سیاست میں پہلے سے ہی سب سے طاقتور شخص مانے جاتے ہیں۔ اب پارلیمنٹ سے ملے اس نئے قانون نے انھیں مزید طاقتور بنا دیا ہے۔ ناقدین کا کہنا ہے کہ ان کا اصل مقصد دہشت گردی سے لڑنا نہیں بلکہ اقتدار پر گرفت مزید مضبوط کرنا ہے۔
