نیوم سیٹی : سعودی ولی عہد اور وزیراعظم شہزادہ محمد بن سلمان اور مصری صدر عبد الفتاح السیسی نے نیوم محل میں دونوں برادر ممالک کے درمیان برادرانہ تعلقات اور مختلف شعبوں میں انہیں مضبوط بنانے کے طریقوں پر تبادلہ خیال کیا۔ اس کے علاوہ علاقائی حالات کی تازہ ترین صورتحال، خاص طور پر فلسطین میں ہونے والی پیش رفت کا جائزہ لیا گیا۔یہ بات سعودی ولی عہد کی جانب سے سعودی عرب کے شمال مغربی علاقے نیوم میں مصری صدر کے استقبال کے دوران کی گئی ۔ اس استقبال میں سعودی وزیر خارجہ شہزادہ فیصل بن فرحان، وزیر مملکت اور قومی سلامتی کے مشیر ڈاکٹر مساعد العیبان اور انٹیلی جنس کے سربراہ خالد الحمیدان بھی موجود تھے۔ مصر کے وزیر خارجہ وزیر ڈاکٹر بدر عبدالعاطی اور جنرل انٹیلی جنس کے سربراہ میجر جنرل حسن رشاد بھی ملاقات میں شریک تھے۔مصری صدر نیوم سے روانہ ہوئے اور سعودی ولی عہد انہیں رخصت کرنے والوں میں پیش پیش تھے۔ مصری صدارت نے اپنی ویب سائٹ کے ذریعے بتایا کہ مصری صدر کا دورہ سعودی ولی عہد اور وزیراعظم شہزادہ محمد بن سلمان کی دعوت پر ہوا تھا۔اسی فریم ورک میں مصری جمہوریہ کے سرکاری ترجمان سفیر محمد شناوی نے کہا کہ صدر کا یہ دورہ مصر اور سعودی عرب کے درمیان گہرے تاریخی تعلقات کے فریم ورک میں آتا ہے۔ ساتھ ہی یہ دونوں ممالک کے درمیان دوطرفہ تعاون کو فروغ دینے اور مشترکہ دلچسپی کے علاقائی اور بین الاقوامی مسائل پر مسلسل رابطہ اور مشاورت جاری رکھنے کے لیے دونوں رہنماؤں کی دلچسپی کا بھی مظہر ہے۔
