نئی دہلی, ( یو این آئی ) ہندوستانی ہاکی کے کھلاڑی اور پدم بھوشن ایوارڈ یافتہ پی آر سری جیش نے ہاکی انڈیا لیگ ( ایچ آئی لیگ) کے آنے والے سیزن کے لیے اپنی ٹیم ‘ایس جی پائپرز کو واضح پیغام دے دیا ہے۔ سری جیش جو اب ایک نئی اور اہم انتظامی ذمہ داری میں نظر آ رہے ہیں، کا کہنا ہے کہ اگر فرنچائز کو گزشتہ سیزن کی ناکامیوں کے ملبے سے نکلنا ہے، تو تجربہ کار کھلاڑیوں کو میدانِ میں قیادت کا بوجھ اٹھانا ہوگا۔یو این آئی سے خصوصی بات چیت کے دوران گزشتہ سیزن کی تلخ یادوں کو تازہ کرتے ہوئے سری جیش نے کہا کہ ٹیم نے آغاز تو جیت سے کیا تھا لیکن پھر شیرازہ بکھر گیا۔ ان کے بقول: جب حالات مشکل ہوئے تو ٹیم میں کوئی ایسا لیڈر نہیں تھا جو گ پست حوصلوں کو سہارا دے سکے۔ تجربہ کار کھلاڑیوں کو آگے بڑھ کر ذمہ داری لینی چاہیے تھی، لیکن ایسا نہ ہو سکا۔ اس بار ہم اس غلطی کو دہرانے کی اجازت نہیں دیں گے۔ایس جی پائپرز نے اس بار تجربہ کار ڈیفنڈر روپندر پال سنگھ کو ٹیم میں شامل کیا ہے۔ سری جیش نے اس فیصلے کی وضاحت کرتے ہوئے کہا کہ ہمیں میدان میں ایک ایسے شخص کی ضرورت ہے جو کھلاڑیوں کو متحرک رکھ سکے اور دباؤ کے لمحات میں ٹیم کی رہنمائی کر سکے۔ہندوستانی جونیئر ٹیم کے ہیڈ کوچ کے طور پر حال ہی میں ورلڈ کپ میں کانسہ کا میڈل جیتنے والے سری جیش اپنی ٹیم کی کارکردگی سے خوش تو ہیں، مگر مطمئن نہیں۔ انہوں نے اعتراف کیا کہ جرمنی کے خلاف سیمی فائنل میں وہ خود بھی کچھ بہتر فیصلے کر سکتے تھے۔ انہوں نے عزم ظاہر کیا کہ ایچ آئی ایل کے بعد وہ نوجوان کھلاڑیوں کو ان کے میچز دکھائیں گے تاکہ وہ اپنی غلطیوں سے سیکھ سکیں اور 2027 کے چیلنجز کے لیے تیار رہیں۔تین بار ‘ایف آئی ایچ گول کیپر آف دی ایئر کا اعزاز جیتنے والے سری جیش نے کھلاڑی اور کوچ کے فرق کو بڑے خوبصورت انداز میں بیان کیا،”بطور کھلاڑی آپ 1 سے 20 تک مسلسل آگے بڑھتے ہیں، لیکن بطور کوچ، جب آپ 20 پر پہنچتے ہیں تو آپ کو دوبارہ ‘صفر سے شروع کرنا پڑتا ہے۔ یہ ایک بڑا چیلنج ہے جس سے میں لطف اندوز ہو رہا ہوں۔ایس جی پائپرز نے مردوں کی ٹیم کے لیے ہالینڈ کے ٹم اوڈینالر اور خواتین کے لیے بیلجیئم کی سوفی جیرٹس کا انتخاب کیا ہے۔ سری جیش کے مطابق یہ دونوں کوچز ‘فاتحانہ ذہنیت اور واضح وژن کے ساتھ آئے ہیں، جو ٹیم میں یورپی ہاکی کا ڈسپلن اور جدید حکمت عملی متعارف کروائیں گے۔واضح رہے کہ ویمنز ہاکی انڈیا لیگ 2025-26 کا انعقاد 28 دسمبر 2025 سے 10 جنوری 2026 تک رانچی میں ہوگا، جبکہ مینز ہاکی انڈیا لیگ 3 سے 26 جنوری کے درمیان چنئی، رانچی اور بھونیشور میں کھیلی جائے گی۔
