نئی دہلی ، (یو این آئی )اسپین سے تعلق رکھنے والے ٹینس کے مایہ ناز ستارے اور چھ بار کے گرینڈ سلیم فاتح کارلوس الکاراز نے سال 2025 میں نہ صرف ٹینس کورٹ پر اپنی مہارت کا لوہا منوایا، بلکہ کمائی کے معاملے میں بھی دنیا کے تمام کھلاڑیوں کو پیچھے چھوڑ دیا ہے۔ اے ٹی پی (ATP) کی جانب سے جاری کردہ تازہ ترین فہرست کے مطابق، الکاراز نے اس سال مجموعی طور پر 21,354,778 ڈالر (تقریباً 21.3 ملین ڈالر) کی خطیر انعامی رقم حاصل کر کے ‘ٹاپ پوزیشن’ حاصل کر لی ہے۔محض 22 سال کی عمر میں الکاراز نے اپنے کیریئر کی مجموعی انعامی رقم میں 60 ملین ڈالر کا ہندسہ عبور کر کے ایک نیا سنگِ میل قائم کر دیا ہے۔ وہ اے ٹی پی کی تاریخ میں ایک سیزن میں سب سے زیادہ کمانے والے دوسرے کھلاڑی بن گئے ہیں۔ وہ اب صرف سربیا کے لیجنڈ نوواک جوکووچ کے 2015 کے ریکارڈ (21.6 ملین ڈالر) سے تھوڑا پیچھے ہیں۔اٹلی کے نوجوان کھلاڑی جینک سینر بھی اس دوڑ میں زیادہ پیچھے نہیں رہے۔ وہ 19,120,641 ڈالر کی کمائی کے ساتھ دوسرے نمبر پر ہیں۔ دلچسپ بات یہ ہے کہ سنر دنیا کے پہلے کھلاڑی بن گئے ہیں جنہوں نے دو مختلف سیزنز (2024 اور 2025) میں 19 ملین ڈالر سے زائد کی رقم بٹوری ہے۔
