واشنگٹن، (یو این آئی) امریکہ کے وزیرِ خارجہ مارکو روبیو نے کمبوڈیا اور تھائی لینڈ کے درمیان جاری تشدد پر تشویش کا اظہار کیا اور دونوں پڑوسیوں کے درمیان مذاکرات میں سہولت کے لیے امریکی حمایت کی پیشکش کی ہے۔ امریکہ وزارتِ خارجہ کے جاری کردہ بیان کے مطابق روبیو نے یہ مسئلہ جمعرات کو کمبوڈیا کے وزیراعظم ہن مینٹ کے ساتھ ٹیلیفونک ملاقات کے دوران اٹھایا ہے۔ انہوں نے صدر ڈونلڈ ٹرمپ کی امن کی خواہش کو دہرایا اور اکتوبر میں ملائشیا میں منعقدہ آسیان سربراہی اجلاس میں دونوں ممالک کے درمیان طے شدہ کوالا لمپور امن معاہدے پر مکمل عملدرآمد کی ضرورت پر زور دیا ہے۔
یہ معاہدہ ایک سرحدی صوبے میں بارودی سرنگ دھماکے میں تھائی فوجیوں کے شدید زخمی ہونے کے بعد معطل کردیا گیا تھا۔ امریکہ وزارتِ خارجہ کے مطابق وزیرِ خارجہ مارکو روبیو نے اس بات کی اعادہ کیاہے کہ امریکہ، کمبوڈیا اور تھائی لینڈ کے درمیان امن و استحکام کی یقین دیانی کی خاطر مذاکرات کے انعقاد میں سہولت فراہم کرنے پر تیار ہے”۔ ہن مینٹ نے کہا ہےکہ دونوں رہنماؤں نے جنگ بندی کی صورتحال اور تھائی لینڈ کے ساتھ امن معاہدے کے نفاذ پر بات چیت کی ہے۔ انہوں نے بنکاک-پنوم پینھ معاہدے کے ساتھ کمبوڈیا کی مضبوط وابستگی پر زور دیا اور امید ظاہر کی ہے کہ دو طرفہ کوششیں سرحدی تنازعات کو حل کرنے اور دیرپا امن حاصل کرنے میں مدد کریں گی۔ یہ ٹیلی فونک ملاقات، اس ماہ کے اوائل میں تصادم دوبارہ شروع ہونے کے بعد تھائی لینڈ اور کمبوڈیا کے درمیان پہلی فوجی بات چیت سے ایک دن بعد ہوئی ہے۔ ملاقات بدھ کو تھائی لینڈ کے صوبہ تھانتابوری میں طے پائی اور ایک گھنٹے سے کم مدت تک جاری رہی تھی۔امکان ہے کہ فوجی مذاکرات جمعہ کو بھی جاری رہیں گے۔ جھڑپیں، 8 دسمبر کو ایک سرحدی واقعے میں دو تھائی فوجیوں کے زخمی ہونے کے بعد، دوبارہ شروع ہو گئی تھیں۔ حکومتی اعداد و شمار کے مطابق اس کے بعد سے دونوں فریقوں کے درمیان لڑائی میں کم از کم 96 افراد ہلاک ہو چکے ہیں۔ تھائی حکام نے کہا ہے کہ 23 فوجی اور ایک شہری براہ راست اور 41 شہری جھڑپوں کے پیدا کردہ منفی ثانوی اثرات کے باعث ہلاک ہوئےہیں۔ کمبوڈیا وزارتِ داخلہ نے بھی 31 کمبوڈین شہری ہلاک ہونے کی اطلاع دی ہے۔ تشدد دوبارہ شروع ہونے کے بعد سے سرحد کے دونوں طرف تقریباً ایک ملین افراد بے گھر ہو چکے ہیں۔
