امراوتی ، پریس ریلیز،ہماراسماج: جمعیۃ علماءضلع و شہر امراوتی کی جانب سےیک روزہ تربیتی ورکشاپ و جلسہ اصلاح معاشرہ و سیرۃالنبیﷺزیر صدارت فخرمہاراشٹر مولانا حافظ محمد ندیم صدیقی صدر جمعیۃ علماء مہاراشٹر منعقد ہوا، جس میں علاقہ بھر سے اراکینِ جمعیۃ و عوام الناس نے شرکت کی۔اجلاس تین حصوں میں منقسم رہا۔ پروگرام کا آغاز بدست صوبائی صدر مولانا حافظ محمد ندیم صدیقی کےپرچم کشائی سے ہوا، جس کے بعد تربیتی ورکشاپ مسجد خضریٰ ، پیراڈائز کالونی، میں منعقد ہوا، پھر بعد نماز ظہر خواتین میں علماء کرام کا خصوصی بیان ہوا، ۔عشاء بعد مسجد خضریٰ میں ہی مولانا توصیف قاسمی جنرل سکریٹری جمعیۃ علماء امراوتی کی نظامت میں عظیم الشان اجلاس عام بعنوان اصلاح معاشرہ و سیرۃ النبی کا آغاز ہوا۔ اجلاس سے خطاب کرتے ہوئے صدر جلسہ مولانا ندیم صدیقی نےسیرتِ طیبہ کی روشنی میں معاشرتی بگاڑ کے حل پر زور دیا۔ انہوں نے جمعیۃ کے ذمہ داران کو خصوصی نصیحت کرتے ہوئے کہا کہ آپ کے مناصب محض عہدے نہیں بلکہ اللہ کی طرف سے ایک بھاری امانت ہیں۔ اصلاحِ معاشرہ کی مہم تبھی کامیاب ہو سکتی ہے جب ہمارے ذمہ داران کے قول و فعل میں ہم آہنگی ہو اور ان کا اخلاق نبوی ﷺ کا آئینہ دار ہو۔ عوام سے نرمی، کام میں شفافیت اور خدمتِ خلق میں اخلاص کو اپنا شعار بنائیںکیونکہ جو شخص دوسروں کی زندگی بدلنا چاہتا ہے، اسے پہلے اپنی زندگی تقویٰ اور سادگی کے سانچے میں ڈھالنی ہوگی۔۔اجلاس میں موجود مقرر خصوصی و مبلغ دارالعلوم دیوبند مولانا عرفان قاسمی نےکہاکہ معاشرے کی اصلاح کا واحد راستہ حضور اکرم ﷺ کی مبارک زندگی کو اپنانا ہے۔ انہوں نے کہا کہ معاشرہ تب بنتا ہے جب گھر بنتا ہے، اور گھر تب بنتا ہے جب فرد کی زندگی میں دین آتا ہے، مفتی محمد روشن شاہ قاسمی صدر دینی تعلیمی بورڈ جمعیۃ علماء مہاراشٹر نے اپنے خطاب میں کہا کہ ہمیں اپنی صفوں میں اتحاد پیدا کرنا ہوگا اور عوام کے ساتھ اپنا تعلق محض تنظیمی نہیں بلکہ ہمدردی اور غمخواری والا رکھنا ہوگا،مولانا ابراہیم قاسمی جنرل سکریٹری جمعیۃ علماء مہاراشٹرنے کہا کہ ایک ذمہ دار کے لیے سب سے بڑی کامیابی یہ ہے کہ اس کا کردار دیکھ کر لوگوں کا اللہ پر بھروسہ بڑھ جائے، مفتی عبدالرحمن اشرفی جنرل سیکریٹری جمعیۃ علماء مراٹھواڑہ نےجمعیۃ علماء کے طریقۂ کار اور اسلامی تعلیمات پر تفصیلی گفتگو کی۔مزید براں جمعیۃ علماء کے علاقائی ذمہ داران بالخصوص مولانا شیخ ریحان مظاہری صدر جمعیۃ علماء ضلع امراوتی،مولانا عبداللہ میمن اشاعتی صدر جمعیۃ علماء شہر امراوتی اور دیگر علماء کرام نے بھی اجلاس عام کو خطاب کیااور از ابتدا تا آخر شریک رہے۔ آخر میں صدر اجلاس مولانا ندیم صدیقی صاحب کی دعاء پر اجلاس کا اختتام ہوا۔ اس اجلاس کو کامیاب بنانے میں مولانامحسن ندوی،قاری حماد،ذاکر سر،وقار سر،اصغربھائی،پپو بھائی،مولانا فیروز اور ان کی ٹیم،منور بیگ،نسیم خان اور جمعیۃ علماء ضلع و شہر امراوتی کےمقامی کارکنان بالخصوص نوجوان طبقہ نےبے انتہا محنت کی اورشریک اجلاس رہے۔
