گیلیفُو (بھوٹان)، ( یو این آئی ) کرکٹ کے میدان سے ایک ایسی خبر سامنے آئی ہے جس نے سب کو حیران کر دیا ہے۔ بھوٹان کے 22 سالہ نوجوان بائیں ہاتھ کے اسپنر سونم یشے نے ٹی 20 بین الاقوامی کرکٹ کی تاریخ کا نیا باب رقم کرتے ہوئے ایک ہی میچ میں 8 وکٹیں حاصل کرنے کا منفرد عالمی اعزاز اپنے نام کر لیا ہے۔ وہ دنیا کے پہلے بولر بن گئے ہیں جنہوں نے مختصر ترین فارمیٹ کے ایک ہی میچ میں 8 شکار کیے۔میانمار کے خلاف کھیلے گئے تیسرے ٹی 20 میچ میں سونم یشے کسی قہر سے کم ثابت نہ ہوئے۔ انہوں نے اپنے مقررہ 4 اوورز میں صرف 7 رنز کے عوض 8 وکٹیں حاصل کر کے حریف ٹیم کے پرخچے اڑا دیے۔ بھوٹان کے 127 رنز کے ہدف کے تعاقب میں میانمار کی پوری ٹیم محض 45 رنز پر ڈھیر ہو گئی۔ سونم کی اس جادوئی بالنگ نے نہ صرف اپنی ٹیم کو فتح دلائی بلکہ ریکارڈ بکس میں بھی اپنا نام سنہرے حروف سے درج کروا لیا۔سونم یشے سے قبل مردوں کی ٹی 20 کرکٹ میں صرف دو بولرز (ملائیشیا کے ادریس اور بحرین کے علی داؤد) سات وکٹیں لینے کا کارنامہ انجام دے سکے تھے۔ ڈومیسٹک کرکٹ میں بھی کولن ایکرمین اور تسکین احمد جیسے نامور بولرز 7 وکٹوں سے آگے نہ بڑھ سکے تھے۔ سونم یشے نے ان تمام ریکارڈز کو پیچھے چھوڑتے ہوئے وہ مقام حاصل کر لیا ہے جو اب تک ناممکن تصور کیا جاتا تھا۔خواتین کی کرکٹ میں انڈونیشیا کی روہمالیا نے 2024 میں منگولیا کے خلاف بغیر کوئی رن دیے 7 وکٹیں حاصل کی تھیں، جو کہ اب تک کا بہترین ریکارڈ تھا۔ تاہم، 8 وکٹوں کا ہندسہ اب تک کسی بھی سطح پر چھوا نہیں گیا تھا، جسے اب سونم یشے نے حقیقت کا روپ دے دیا ہے۔جولائی 2022 میں ملائیشیا کے خلاف اپنے کیریئر کا آغاز کرنے والے سونم یشے نے اب تک 34 میچوں میں 37 وکٹیں حاصل کی ہیں۔ موجودہ سیریز میں ان کی فارم عروج پر ہے جہاں وہ چار میچوں میں 12 وکٹیں حاصل کر چکے ہیں اور ابھی سیریز کا آخری معرکہ باقی ہے۔
