بچے بچیوں میں دینی شعور اور حلال وحرام کی تمیز پیدا کرنا مکاتب دینیہ کی ذمہ داری ہے

مرادآباد،سماج نیوز سروس: یکم جنوری 2026 جمعرات کا دن اہل مرادآباد کے لیے خاص طور پر جمعیت علماء شہر مرادآباد اور دینی تعلیمی بورڈ کے لیے خوش کن اور تاریخی ثابت ہوا جہاں ایک طرف صوبہ اتر پردیش کی جمیعت علماء اور دینی تعلیمی بورڈ کی مجالس عاملہ کے منتخب ارکان اور مدعوئین خصوصی کی میزبانی کا شرف ایچ بی کلائڈ ہوٹل میں جمیعت علماء شہر مرادآباد کو میسر آیا ۔حضرت مفتی سید محمد عفان منصور پوری دامت برکاتہم کی صدارت میں منعقد ہونے والے اس اجلاس میں جمیعت کی یونٹوں کو مضبوط کرنے اور باہمی ربط و اتحاد کے ساتھ جمیعت کے تمام شعبہ جات کو زمینی سطح پر عملی جامہ پہنانے پر غور و خوص کیا گیا۔ ملک کی موجودہ صورتحال خاص طور پر اوقاف کی رجسٹریشن ایس آئی آر کی حتمی لسٹ آنے کے بعد کی صورتحال پر انتہائی گہرائی سے جائزہ لیا گیا فرقہ پرست لوگوں کی طرف سے کھلے عام ہتھیاروں کی تقسیم کے باوجود حکومتوں کے آنکھیں بند کر لینے کی سخت الفاظ میں مذمت کی گئی ہے ۔ اہل مدارس و مکاتب کو جانچ کے نام پر پریشان کرنے پر سخت تشویش ظاہر کی گئی اس کے ساتھ ساتھ دیگر اہم موضوعات پر بھی گفت و شنید ہوئ اس کے علاوہ دینی تعلیمی بورڈ کی مجلس عاملہ میں مختلف اضلاع کی مکاتب کی رپورٹ سامنے رکھی گئی اس کی روشنی میں آئندہ تین مہینوں میں مکاتب قائم کرنے پر ہر ضلع سے عزائم لیے گئے تاکہ زیادہ سے زیادہ مکاتب کا قیام ممکن ہوسکے ۔وہیں دوسری طرف عشاء کے بعد مسجد ارقم شیخ عبدالجبار کالونی کرولہ پر ایک عظیم الشان دینی تعلیمی بیداری کانفرنس منعقد ہوئی جس میں مہمان خصوصی کے طور پر نائب امیر الہند اقدس مولانا مفتی سید محمد سلمان منصور پوری دامت برکاتہم العالیہ استاد حدیث وفقہ دارالعلوم دیوبند و ناظم عمومی مرکزی دینی تعلیمی بورڈ جمعیت علماء ہند اور مفتی سید محمد عفان منصور پوری دامت برکاتہم العالیہ صدر المدرسین جامع مسجد امروہہ و صدر جمعیت علماء و دینی تعلیمی بورڈ اتر پردیش اپنی مصروفیتوں کے باوجود شریک ہوئے یہ کانفرنس دراصل اس مہم کا حصہ تھی جو دینی تعلیمی بورڈ جمعیت علماء ہند کے حکم پر پورے ملک میں ہر سال ماہ رجب المرجب کو دینی تعلیمی بیداری مہم کے طور پر منائی جاتی ہے چنانچہ ہمارے مرادآباد میں مختلف محلوں کی مساجد میں جمعہ کے بیانات اسی عنوان پر ہوئے اور دیگر مساجد میں کسی بھی نماز کے بعد دعا سے پہلے پانچ منٹ میں مثالی اور معیاری مکاتب کی اہمیت و ضرورت پر لوگوں کے سامنے بات کی گئی اور نسل نو کے دل و دماغ میں سوشل میڈیا کے ذریعے عقیدے دین و ایمان کے تعلق سے جو شکوک و شبہات پیدا کرنے کی سازش ہو رہی ہیں اس کی روک تھام کے لیے بچے اور بچیوں کو مکاتب میں لازمی طور پر بھیجنے کی ترغیب دلائی گئی پروگرام کی صدارت جناب مولانا محمد طاہر قاسمی نے کی جبکہ نظامت جناب مولانا مزمل نے فرمائی : پروگرام کا باقاعدہ آغاز محمد منفعت سلمہ (طالب علم، مکتب درس القرآن والسنۃ، یوسف کالونی، گلی نمبر 1) کی پُرسوز تلاوتِ کلامِ پاک سے ہوا۔اس کے بعد محمد ایان (مکتب معاذ بن جبلؓ، رحمت نگر، کرولہ) نے نعتِ رسول ﷺ پیش کر کے محفل کو معطر فرمایا۔پہلا خطاب:کانفرنس کا پہلا خطاب، نوجوانوں کے دلوں کی دھڑکن، نواسۂ شیخ الاسلام اقدس مولانا مفتی سید محمد عفان منصورپوری(شیخ الحدیث و صدر المدرسین، الجامعۃ الاسلامیہ جامع مسجد امروہہ و صدر جمعیۃ علماء اتر پردیش) نے فرمایا۔ والا نے اپنے مؤثر خطاب میں اس بات پر زور دیا کہ: دینِ اسلام پر مضبوطی سے قائم رہنا وقت کی اہم ترین ضرورت ہے۔ حضور اکرم ﷺ کی سیرتِ طیبہ کو اپنی زندگی کا کامل نمونہ بنایا جائے۔ آپ ﷺ کی بتائی ہوئی تین بنیادی نصیحتوں پر عمل اور تین بڑے گناہوں سے مکمل اجتناب کی تلقین فرمائی۔ دوسرا خطاب:اس کے بعد نواسۂ شیخ الاسلام مولانا مفتی سید محمد سلمان منصورپوری (استادِ حدیث و فقہ، دارالعلوم دیوبند و نائب امیر الہند و ناظمِ عمومی دینی تعلیمی بورڈ جمعیۃ علماء ہند) نے خطاب فرمایا۔ مکاتب کی اہمیت و افادیت کو نہایت واضح انداز میں بیان کرتے ہوئے نےنئی نسل کو ارتداد، فکری گمراہی اور غیر اسلامی تہذیب سے بچانے پر زور دیا۔ فرمایا کہ جمعیۃ علماء ہند کے اکابرین کے قائم کردہ منظم مکاتب کا نظام وقت کی سب سے بڑی ضرورت ہے۔ اس بات کی ترغیب دی کہ ہمارے محلوں میں کوئی ایسی مسجد باقی نہ رہے جہاں منظم مکتب قائم نہ ہو۔ نے ایک مؤثر واقعہ بیان کرتے ہوئے بتایا کہ: اسکولوں میں غیر اسلامی تہواروں میں مسلم بچوں کو شریک کیا جا رہا ہے، لیکن جس بچے کے عقائد مکاتب کے ذریعے مضبوط ہو چکے تھے، اس نے فوراً انکار کر دیا۔ یہی عقیدہ اور دین و ایمان کی مضبوطی مکاتب کی تعلیم کا نتیجہ ھے ۔ آخر میں نے اس عزم کا اظہار فرمایا کہ: ہم سب کو مل کر جمعیۃ علماء کے دینی مشن کو مضبوطی سے آگے بڑھانا ہے اور اپنی نئی نسل کے ایمان و عقائد کی حفاظت کرنی ہے۔ مولانا مفتی سید محمد سلمان منصورپوری کی پُراثر دعا پر اس بابرکت کانفرنس کا اختتام ہوا۔ پروگرام میں کثیر تعداد میں اہلِ علاقہ اور ذمہ داران مساجد و مکاتب نے شرکت کی، خاص طور پر مولانا مفتی ابوبکر صدیق منصورپوری ذمہ دار، دینی تعلیمی بورڈ مرادآباد ،قاری نجیب ،الرحمن ،حافظ محمد عالم ،قاری ابراہیم نائب صدور جمعیت علماء شہر مرادآباد ،جناب قاری نفیس الرحمن ،مفتی عبدالحق رسولپوری،مفتی اجمل (مہتمم مدرسہ حیات العلوم) مفتی محمد فاروق ،مفتی طیب و دیگر معزز حضراتِ شریک رہے ۔آخر میں مولانا مزمل حسین نے آنے والے مہمانوں کا شکریہ ادا کیا خاص طور پر مسجد ارقم کے ذمہ دار ساتھیوں کی اس پروگرام کو کامیاب بنانے کے لیے محنتوں کو سراہا۔مجلس عاملہ اور کانفرنس کو کامیاب بنانے میں جمعیت کے تمام ورکرز نے بھرپور انداز میں بڑھ چڑھ کر حصہ لیا۔