ہم ہندو ہیں ہندی نہیں…! راج ٹھاکرےکے ہندتوا اور مراٹھی کے معاملے پر سخت الفاظ

ممبئی، ایجنسیاں:ممبئی میونسپل کارپوریشن (بی ایم سی) انتخابات سے پہلے، مہاراشٹر کی سیاست میں ایک اہم پیش رفت سامنے آئی ہے۔ شیوسینا (یو بی ٹی) کے سربراہ ادھو ٹھاکرے اور مہاراشٹر نونرمان سینا (ایم این ایس) کے صدر راج ٹھاکرے نے ایک مشترکہ پریس کانفرنس کی اور حکمران اتحاد اور انتخابی عمل پر سخت حملہ کیا۔ دونوں رہنماؤں نے اپنا مشترکہ انتخابی منشور جلد جاری کرنے کا اعلان کیا۔ ٹھاکرے نے کہا، "یہ اب جمہوریت نہیں رہی، یہ ایک کلیپٹو کریسی بن گئی ہے۔ پہلے ووٹ چوری ہوتے تھے، لیکن اب امیدواروں کو چوری کیا جا رہا ہے۔ اگر ہم انہیں رنگے ہاتھوں پکڑیں تو بھی کوئی کارروائی نہیں ہوتی۔” وزیر اعظم نریندر مودی پر طنز کرتے ہوئے، انہوں نے کہا، "وہ خود کو افسانوی کارناموں سے جوڑتے ہیں، لیکن برسوں پہلے سمندر میں پوجا کرنے کے باوجود، چھترپتی شیواجی مہاراج کا مجسمہ ابھی تک نہیں ملا ہے۔” ٹھاکرے نے الیکشن کمیشن کو کھلا چیلنج کرتے ہوئے مطالبہ کیا کہ تمام ریٹرننگ افسران کے کال ریکارڈ کو عام کیا جائے تاکہ حقیقت سامنے آسکے۔ ٹھاکرے نے اسمبلی کے اسپیکر راہل نارویکر پر سنگین الزامات عائد کرتے ہوئے کہا، "ایک آئینی عہدہ پر فائز شخص کے لیے امیدواروں اور ووٹروں کو کھلے عام دھمکی دینا حیران کن ہے۔” انہوں نے کہا کہ راہل نارویکر کو فوری طور پر معطل کیا جانا چاہئے اور ان کے خلاف مقدمہ درج کیا جانا چاہئے۔ادھو نے الزام لگایا کہ اسمبلی کے اسپیکر عہدیداروں کو اسمبلی کے باہر لیڈروں سے سیکورٹی ہٹانے کی ہدایت نہیں دے سکتے۔ انہوں نے کہا کہ بلامقابلہ امیدواروں کو منتخب کر کے ووٹرز کو ان کے حق رائے دہی سے محروم کیا گیا ہے اور ایسے تمام علاقوں میں ضمنی انتخابات کرائے جائیں۔ ایم این ایس کے سربراہ راج ٹھاکرے نے مغربی بنگال میں بلامقابلہ امیدواروں کے خلاف بی جے پی کے سپریم کورٹ سے رجوع کرنے پر سوال اٹھایا، لیکن وہی پارٹی مہاراشٹر میں اس معاملے پر خاموش کیوں ہے؟ راج ٹھاکرے نے خبردار کیا کہ کوئی طاقت مستقل نہیں ہوتی۔ جو لوگ سمجھتے ہیں کہ وہ کبھی اقتدار سے باہر نہیں ہوں گے انہیں دوبارہ سوچنا چاہیے۔