سڈنی،(یواین آئی )انگلینڈ کے 22 سالہ نوجوان آل راؤنڈر جیکب بیتھل نے سڈنی کرکٹ گراؤنڈ کی تپتی دھوپ میں وہ کرشمہ کر دکھایا جس نے انہیں دنیائے کرکٹ کے عظیم ترین کھلاڑیوں کی صف میں لا کھڑا کیا ہے۔ ایشز سیریز کے پانچویں ٹیسٹ کے چوتھے روز بیتھل نے نہ صرف اپنے کیریئر کی پہلی فرسٹ کلاس سنچری اسکور کی، بلکہ وہ ہندوستان کے لیجنڈری کپل دیو کے ایک ایسے مخصوص کلب کا حصہ بن گئے جہاں پہنچنا ہر کسی کے بس کی بات نہیں۔جیکب بیتھل اب ان گنتی کے چند کھلاڑیوں میں شامل ہو گئے ہیں جنہوں نے اپنی زندگی کی پہلی فرسٹ کلاس سنچری براہِ راست انٹرنیشنل کرکٹ (ٹیسٹ میچ) میں اسکور کی۔ اس کلب میں کپل دیو، مارلن سیموئلز، مہدی حسن میراج اور کرٹس کیمفر جیسے نام شامل ہیں۔ بیتھل یہ کارنامہ انجام دینے والے دنیا کے محض پانچویں اور ایشز کی تاریخ کے دوسرے انگلش کھلاڑی بن گئے ہیں۔کک اور گاور کے نقشِ قدم پربیتھل کی اس اننگز نے انہیں انگلینڈ کے کم عمر ترین سنچری بنانے والے کھلاڑیوں کی فہرست میں بھی شامل کر دیا ہے،دوسری عالمی جنگ کے بعد، وہ ایلسٹر کک اور ڈیوڈ گاور کے بعد ایشز میں سنچری بنانے والے تیسرے کم عمر ترین انگلش بلے باز ہیں۔وہ 1989 میں جیک رسل کے بعد پہلے انگلش کھلاڑی ہیں جنہوں نے ٹیسٹ میچ میں اپنی پہلی فرسٹ کلاس سنچری مکمل کی۔ بیتھل نے اپنی سنچری کسی روایتی انداز میں نہیں بلکہ ببو ویبسٹر کو مڈ وکٹ کے اوپر سے کلین شاٹ لگا کر مکمل کی۔ جیسے ہی گیند باؤنڈری لائن پار کر گئی، بیتھل نے اپنا ہیلمٹ اتارا اور تماشائیوں کے شور میں اپنے بلے کو بلند کیا۔ اسٹینڈز میں موجود ان کے اہل خانہ کے لیے یہ ایک جذباتی لمحہ تھا، جن کی آنکھوں میں خوشی کے آنسو نمایاں تھے۔
