کٹیہار، پریس ریلیز: کٹیہار: الکریم یونیورسٹی، کٹیہار میں چوتھے کانووکیشن کا شاندار انعقاد کیا گیا، جس میں بہار کے معزز گورنر جناب عارف محمد خان صاحب نے بحیثیت مہمانِ خصوصی شرکت کی۔ اس موقع پر ریاستی وزیرِ صحت جناب منگل پانڈے، وزیرِ دیہی ترقی جناب شراون کمار، این سی ایم ای آئی کے قائم مقام چیئرمین پروفیسر شاہد اختر، یونیورسٹی کے چانسلر جناب احمد اشفاق کریم صاحب اور پروگرام کی صدارت کرنے والے پروفیسر طلعت احمد صاحب بطور معزز مہمان موجود تھے۔اس موقع پر معزز گورنر نے کٹیہار میڈیکل کالج کے جدید اور عالمی معیار کے ماڈیولر آپریشن تھیٹر کا افتتاح کیا۔ افتتاح کے بعد اپنے خطاب میں گورنر عارف محمد خان نے کہا، “تعلیم کا مقصد صرف ڈگری حاصل کرنا نہیں بلکہ اخلاقی اقدار، انسانی حساسیت اور قوم کی خدمت کے جذبے کو مضبوط کرنا ہے۔ نوجوانوں کو ملک اور سماج کی تعمیر میں فعال کردار ادا کرنا چاہیے۔”کانووکیشن کے دوران ایم بی بی ایس، ایم ایس، بی فارما سمیت مختلف تعلیمی پروگراموں کے 415 طلبہ کو اسناد دی گئیں، جبکہ 15 نمایاں کارکردگی دکھانے والے طلبہ کو گولڈ میڈلز سے نوازا گیا۔ اسی موقع پر وزیرِ صحت جناب منگل پانڈے اور وزیرِ دیہی ترقی جناب شراون کمار کو عوامی خدمت، انتظامی اور سماجی شعبوں میں ان کی نمایاں خدمات کے اعتراف میں اعزازی پی ایچ ڈی کی ڈگری سے سرفراز کیا گیا۔وزیرِ صحت جناب منگل پانڈے نے اپنے خطاب میں کہا، “الکریم یونیورسٹی طبی تعلیم کے میدان میں مسلسل ترقی کر رہی ہے۔ سیمانچل جیسے علاقے میں جدید طبی سہولیات اور معیاری تعلیم کی فراہمی قابلِ ستائش ہے۔” وزیرِ دیہی ترقی جناب شراون کمار نے کہا، “یہ یونیورسٹی تعلیم کے ذریعے سماجی تبدیلی کا ایک مضبوط ذریعہ بن رہی ہے۔ یہاں سے فارغ التحصیل طلبہ ریاست اور سماج کی ترقی میں اہم کردار ادا کریں گے۔”این سی ایم ای آئی کے قائم مقام چیئرمین پروفیسر شاہد اختر نے یونیورسٹی کی تعریف کرتے ہوئے کہا، “الکریم یونیورسٹی اقلیتی تعلیم کے میدان میں معیار، نظم و ضبط اور لگن کی بہترین مثال ہے۔”یونیورسٹی کے چانسلر جناب احمد اشفاق کریم صاحب نے کہا، “ہمارا مقصد صرف ڈگریاں دینا نہیں بلکہ ایسے ذمہ دار شہری تیار کرنا ہے جو اخلاقی، پیشہ ورانہ اور سماجی طور پر باصلاحیت ہوں۔”پروگرام کی صدارت کرتے ہوئے پروفیسر طلعت احمد نے کہا، “یہ کانووکیشن طلبہ کی محنت، اساتذہ کی رہنمائی اور ادارے کے عزم کا مظہر ہے۔” انہوں نے تمام مہمانوں کا شکریہ ادا کیا اور طلبہ کے روشن مستقبل کے لیے نیک تمناؤں کا اظہار کیا۔
