دیوبند،سماج نیوز سروس: سماجوادی پارٹی کے قومی صدر اکھلیش یادو کی ہدایات پر آشوملک کی قیادت میں ایک نمائندہ وفد نے شیخ پورہ قدیم پہنچ کر ہریانہ میں حادثانی طور پر فوت ہونے والوں کے اہل خانہ سے ملاقات کی اور انہیں امدادکے طور پر 50-50ہزار روپے کے چیک دئیے اورہرممکنہ مدد کی یقین دہانی کرائی ۔واضح ہوکہ ماہ دسمبر میں ہریانہ کے کرکشتیر میں ٹھیکیدار انور احمد کے ساتھ شیخ پورہ قدیم کے چارنوجوانوں رنگ وروغن کا کام کرنے گئے تھے ان کا قیام ایک ہوٹل میں تھا ۔شدید سردی کے باعث کمرہ میں انگیٹھی جلالی ۔انگیٹھی جلنے کے باعث بننے والی گیس سے چاروں نوجوانوںکی دم گھٹنے سے موت ہوگئی تھی ۔ان نوجوانوں کے نام نور ،مدن لال ،روشن لال اور سونو تھے یہ سبھی شیخ پورہ قدیم کے باشندے تھے ۔آشو ملک کی قیادت میں سماجوادی پارٹی کے وفد نے متاثرہ خاندانوں سے ملاقات کرکے انہیں مالی امداد کے طور پرچیک دیئے ۔آشو ملک نے کہا کہ سماجوادی پارٹی بلاتفریق سب کی مدد کرتی ہے ۔انہوں نے کہا کہ یہ حادثہ دل دہلادینے والا تھا ،انہوں نے کہا کہ سماجوادی پارٹی ہر وقت غم زدہ خاندانوں کے ساتھ کھڑی ہے اور ان کی ہرممکنہ مدد کی جائے گی ۔عمر علی خاں نے اس حادثہ پر اپنے تاثرات کا اظہار کرتے ہوئے کہا کہ اچانک رونما ہونے والے حادثہ نے کئی خاندانوں کو جھنجھوڑ کر رکھدیا ہے ۔انہوں نے کہا کہ آئندہ بھی پارٹی کی جانب سے ان متاثرین کی مدد کی جائے گی ۔ضلع صدر چودھری عبدالواحد نے کہا کہ سماجوادی پارٹی ہرایک طبقہ کے لئے اس کے سکھ دکھ میں ساتھ کھڑی ہے ۔وفد کے ارکان نے حادثہ میںفوت ہوجانے کے لئے دکھ کا اظہار کیا اور پسماندگان سے اظہار ہمدردی کیا ۔
