آر ایس ایس نے سونے سے لکھا قرآن انڈین سائنس کانگریس میں نمائش میں رکھا

ناگپور: راشٹریہ سویم سیوک سنگھ سے متاثر تنظیم کے ذریعہ محفوظ سونے کی سیاہی میں لکھے گئے قرآن پاک کا 16 ویں صدی کا ایک نایاب نسخہ 108 ویں انڈین سائنس کانگریس میں نمائش کے لیے رکھا گیا ہے جو اس وقت یہاں مہاراشٹر میں منعقد ہو رہی ہے۔ سونے کی روشنائی والے قرآن کی نمائش کرنے والی تنظیم کے ایک عہدیدار نے بتایا کہ دنیا میں اس مقدس کتاب کے صرف چار نسخے ہیں۔قرآن کا نسخہ اور کچھ قدیم نسخے، جن میں سے کچھ صدیوں پرانے مانے جاتے ہیں،آئی ایس سی نمائش میں ناگپور میں قائم ریسرچ فار ریسرجینس فاؤنڈیشن کے ایک اسٹال پر رکھے گئے ہیں۔آرایف آر ایف بھارتیہ تعلیم منڈل کا ریسرچ ونگ ہے اور قدیم ہندوستانی علمی نظام کو محفوظ رکھنے اور اسے موجودہ تناظر میں نافذ کرنے کے لیے کام کرتا ہے۔ اس کی ویب سائٹ کے مطابق، منڈل تعلیم کے میدان میں قومی بحالی کے لیے تشکیل دیا گیا تھا۔ سونے کی سیاہی سے بنا یہ قرآن 16ویں صدی میں لکھا گیا تھا۔ دنیا میں اس قرآن کے صرف چار نسخے ہیں۔