مدرسہ فیض العلوم میں منعقدہ سالانہ اجلاس میں 92طالب علموں کی دستاربندی

دیوبند،سماج نیوز سروس: مدرسہ فیض العلوم مرزاپور میں سالانہ اجلاس منعقد کیا گیا ۔اس اجلاس میں مہمان خصوصی کے طور پر دارالعلوم کے نائب مہتمم مولانا مفتی راشد اعظمی نے شرکت کی ۔اس کے علاوہ مظاہرالعلوم کے امین عام حضرت مولانا مفتی محمد صالح بھی موجود رہے سالانہ اجلاس کے دوران مدرسہ کے ذمہ داران نے ادارہ کی تعلیمی سرگرمیوں کی تفصیلات بیان کرتے ہوئے بتایا کہ اس سال پچیس طلبہ نے حفظ قرآن پاک مکمل کیا ہے جبکہ 37طلبہ نے قرآن پاک ناظرہ مکمل کیا ۔اس کے علاوہ پندرہ طالب علموں نے مشکاۃ شریف سے فراغت حاصل کی ۔اجلاس کے دوران مشکوٰۃ شریف کی آخری حدیث پڑھائی گئی اور طلبہ کو قرآن پاک مکمل کرایا گیا ۔بعدازاں تقریباً 92طالب علموں کو پگڑی پہنا کر دستاربندی کی گئی ۔اس موقع پر دارالعلوم دیوبند کے نائب مہتمم مولانا مفتی محمد راشد اعظمی نے طلبہ سے خطاب کرتے ہوئے کہا کہ قرآن پاک پوری کائنات کے لئے زندگی گزانے کا آئین ہے اور اس میں بتائی گئی باتیں حقیقت پر مبنی ہیں ،انہوں نے بتایا کہ قرآن پاک انسانی زندگی کے ہرپہلو کی رہنمائی کرتا ہے اور دنیا وآخرت میں کامیابی کی کنجی ہے ۔اجلاس کے اختتام پر ادارہ کے احاطہ میں ہی پانچ افراد کا نکاح پڑھایا گیا ۔اس موقع پر فیض العلوم کا عملہ اور مہمان کرام کے علاوہ بڑی تعداد میں طلبہ موجود رہے ۔