نئی دہلی،(یو این آئی) وزیرِ اعظم نریندر مودی نے کہا ہے کہ ہندوستانی ریلوے جدید ہونے کے ساتھ ساتھ خود کفیل بھی بنتی جا رہی ہے۔ ریل انجن، ریل کے ڈبے اور ہندوستان کے میٹرو کوچ اب ملک کی تکنیکی صلاحیت کی شناخت بن رہے ہیں۔مسٹر مودی نے ہفتہ کے روز مغربی بنگال کے مالدہ میں 3,250 کروڑ روپے سے زائد کے ریل اور سڑک بنیادی ڈھانچے کی منصوبہ بندیوں کا افتتاح کرنے کے بعد کہا کہ ہندوستانی ریلوے نہ صرف جدید ہو رہی ہے بلکہ خود کفیل کی راہ پر بھی گامزن ہے۔ ہندوستان کے ریل انجن، کوچز اور میٹرو ٹرینیں اب ملک کی ٹیکنالوجی کی علامت بن چکی ہیں۔ انہوں نے کہا کہ ہندوستان امریکہ اور یورپ کے مقابلے زیادہ لوکوموٹیوز تیار کر رہا ہے اور دنیا کے کئی ممالک کو مسافر ٹرینوں اور میٹرو ٹرینوں کے کوچ برآمد کیے جا رہے ہیں۔ اس سے ہماری معیشت کو بڑا فائدہ ہو رہا ہے اور نوجوانوں کو روزگار کے مواقع مل رہے ہیں۔ انہوں نے مزید کہا کہ ہندوستان کو جوڑنا ہماری ترجیح ہے، فاصلے کم کرنا ہمارا مشن ہے اور یہ بات اس پروگرام میں بھی صاف نظر آتی ہے۔وزیرِ اعظم نے کہا کہ آج مالدہ سے مغربی بنگال کی ترقی کو نئی رفتار ملی ہے۔ کئی پروجیکٹوں کا سنگِ بنیاد رکھا گیا ہے، جس سے یہاں کے لوگوں کو نئے مواقع حاصل ہوں گے۔ آج سے وندے بھارت سلیپر ٹرینوں کا آغاز ہو رہا ہے جو لوگوں کے سفر کو یادگار بنائیں گی۔ وندے بھارت ٹرین میں وکست بھارت کی تصویر نظر آئے گی۔ انہوں نے کہا کہ کبھی ہم غیر ملکی ٹرینوں کو دیکھ کر کہتے تھے کہ کاش ایسی ٹرین ہندوستان میں بھی ہوتی، اور آج اسی خواب کو حقیقت میں بدلا جا رہا ہے۔ یہ وندے بھارت سلیپر ٹرین ماں کالی اور کاماکھیا کی سرزمین کو جوڑ رہی ہے۔انہوں نے کہا کہ ہندوستانی ریلوے اس وقت ایک ہمہ جہت تبدیلی کے دور سے گزر رہی ہے۔ مغربی بنگال سمیت پورے ملک میں 150 سے زیادہ وندے بھارت ٹرینیں چل رہی ہیں۔ آج بنگال کو مزید چار جدید امرت بھارت ٹرینیں ملی ہیں، جس سے بنگال، بالخصوص شمالی بنگال، جنوبی اور مغربی ہند سے مزید مضبوطی سے جُڑ جائے گا۔وزیر اعظم نریندر مودی نے ہفتہ کے روز ہاوڑہ سے گوہاٹی کے درمیان چلنے والی ملک کی پہلی وندے بھارت سلیپر ٹرین کو روانہ کیا اور کہا کہ ہندوستان کو جوڑنا ان کی حکومت کی اہم ترجیحات میں شامل ہے۔ ٹرین کو ہری جھنڈی دکھانے سے قبل وزیر اعظم نے یہاں طلبہ سے بات چیت بھی کی۔ اس دوران بعض طلبہ نے وزیر اعظم کو پینٹنگز بطور تحفہ پیش کی۔ وزیر اعظم نے ٹرین میں سنٹرل اسکول کے طلبہ سے گفتگو کی۔ اس موقع پر وزیر اعظم نے کہا کہ پہلے لوگ دیگر ملکوں کی جدید ٹرینوں کو دیکھ کر یہ امید کیا کرتے تھے کہ ہندوستان میں بھی ایسی ٹرینیں ہوں۔ اب وہ خواب حقیقت بن رہا ہے۔ انہوں نے کہا کہ ملک کی پہلی وندے بھارت سلیپر ٹرین ماں درگا اور ماں کاماکھیا کی سرزمین کو جوڑ رہی ہے۔ اس پر انہوں نے مغربی بنگال اور آسام کے عوام کو مبارکباد دی۔ پی ایم مودی نے کہا کہ ریلوے اس وقت ایک بڑی تبدیلی کے دور سے گزر رہی ہے۔ آج مغربی بنگال سمیت پورے ملک میں 150 سے زائد وندے بھارت ٹرینیں چل رہی ہیں۔ جدید اور تیز رفتار ٹرینوں کا ایک وسیع نیٹ ورک تیار ہو رہا ہے جس سے مغربی بنگال کے غریب اور متوسط طبقے کے خاندانوں کو فائدہ پہنچ رہا ہے۔ وزیر اعظم نے مغربی بنگال کو ملی مزید چار وندے بھارت ٹرینوں کا ذکر کرتے ہوئے کہا کہ جو لوگ ملک کے مختلف حصوں سے بنگال اور مشرقی ہندوستان کا سفر کرتے ہیں ان ٹرینوں سے ان کا سفر آسان ہوگا۔
