حیدرآباد، 24 جنوری (یو این آئی) سرفراز خان محمد اظہرالدین کے ویڈیوز دیکھ کر بڑے ہوئے ہیں اور جمعہ کے روز حیدرآباد میں ایلیٹ گروپ ڈی میچ میں حیدرآباد کے خلاف ڈبل سنچری (227) بنانے کے بعد ممبئی کے اس بلے باز نے اپنی شاندار کارکردگی کا کریڈیٹ سابق ہندوستانی کپتان کو دیا۔ جبکہ اظہر نے کہا کہ سارا کریڈٹ کھلاڑی کو ہی ملنا چاہیے۔ اظہر نے جمعہ کی شام کرک بج سے کہا کہ ‘سارا کریڈٹ سرفراز کو ملنا چاہیے۔ مجھے کیوں؟
سرفراز کے رات بھر 128 رنز پر ناٹ آؤٹ رہنے کے بعد ڈبل سنچری مکمل کرنے کے چند گھنٹے بعد وہ میرے دفتر آئے اور ان کے کچھ سوالات تھے، میں نے انہیں کچھ باتیں بتائیں۔ یہ میرا فرض ہے اور میں نے اسے سمجھایا کہ یہ کام کیسے کیا جانا چاہیے۔ میں انہیں اس شاندار اننگز پر مبارکباد دیتا ہوں۔ اظہر نے یہ بتانے سے انکار کر دیا کہ سوالات کیا تھے، یہ کہتے ہوئے کہ اس کے بارے میں بلے باز سے ہی پوچھا جانا چاہیے۔ تاہم ان کا ماننا تھا کہ سرفراز کو ہندوستان کے لیے منتخب کیا جانا چاہیے۔ انہوں نے اچھی کارکردگی دکھائی ہے۔ انہیں ہندوستانی ٹیم کے لیے منتخب کیا جانا چاہیے، انہیں مواقع نہیں مل رہے ہیں۔ وہ ایک جارح بلے باز ہیں اور انہیں زیادہ مواقع نہیں ملے ہیں۔ سرفراز نے جو چھ ٹیسٹ میچ کھیلے ہیں، ان میں انہوں نے ایک سنچری بنائی ہے۔ انہوں نے نومبر 2024 کے بعد سے ہندوستان کے لیے کوئی میچ نہیں کھیلا ہے۔
28 سالہ سرفراز، جو ممبئی کی بیٹنگ کا اہم ستون ہیں، نے انکشاف کیا کہ میچ سے ایک دن قبل گفتگو کے دوران انہوں نے اظہر سے کیا سیکھا۔ دوہری سنچریاں خاص ہوتی ہیں، اچھا لگا، پچ اتنی آسان نہیں تھی۔ گیند کبھی کبھی نیچی رہ جا رہی تھی۔ اس وکٹ پر وہی کھڑا رہ سکتا ہے اور رنز بنا سکتا ہے جو جارحانہ انداز میں کھیلے۔ میں نے اپنے کیریئر میں ریورس سوئنگ زیادہ نہیں کھیلی ہے۔ یہ اچھا ہوا کہ میں ایک دن پہلے اظہر سر کے پاس گیا۔ میری خواہش تھی کہ میں ان سے کرکٹ پر تفصیل سے بات کروں۔ میں ان سے ان کے دفتر میں ملا۔ انہوں نے مجھے بتایا کہ یہاں گیند جلدی ریورس ہوتی ہے۔
انہوں نے مجھے سمجھایا کہ اسے کیسے کھیلنا ہے اور اِن سوئنگ کے لیے کہاں کھڑا ہونا ہے۔ لیگ اسٹمپ پر انہوں نے مجھے بہت سی باتیں بتائیں۔ وہ کھڑے ہو کر مختلف شاٹس کھیلنے کا طریقہ بھی سمجھانے لگے۔ ہم نے تقریباً دو گھنٹے ساتھ گزارے۔ میں ان سے پہلے بھی ملا تھا، لیکن اس طرح کبھی نہیں۔ سرفراز نے یہ بھی بتایا کہ انہوں نے اظہر کی بیٹنگ کے ویڈیوز دیکھ کر بہت کچھ سیکھا۔ جب میں چھوٹا تھا تو میرے ابو مجھے ان کی بیٹنگ کے ویڈیوز دکھاتے تھے۔اب بھی وہ مجھے اظہر کے یوٹیوب ویڈیوز دکھاتے ہیں کہ فلک شاٹ کیسے کھیلا جاتا ہے۔ میں ان کے اسٹائل کا بہت بڑا مداح ہوں۔ سرفراز نے یہ بھی بتایا کہ سنچری (جمعرات کو) اور ڈبل سنچری (جمعہ کو) بنانے کے بعد انہوں نے نعرہ لگایا تھا کہ’ ممبئی میری ماں ہے۔‘
