پوپری میں فائیلیریا کے خاتمے کی مہم کو لے کر تیاریاں تیز، آشاؤں کو ایک روزہ خصوصی تربیت ڈاکٹر کفیل اختر نے کہا: مہم کی کامیابی میں آشاؤں کا کردار سب سے اہم

جالے:محمد رفیع ساگر : پرائمری ہیلتھ سینٹر پوپری میں فائیلیریا کے خاتمے کے لیے 10 فروری سے شروع ہونے والے ایم ڈی ایم پروگرام کو کامیاب بنانے کی تیاریاں تیز کر دی گئی ہیں۔ اسی سلسلے میں آج 4 فروری کو پی ایچ سی پوپری کے میٹنگ ہال میں تمام آشا فیسلیٹیٹرز اور آشا کارکنوں کے لیے ایک روزہ تربیتی پروگرام کا انعقاد کیا گیا، جس میں مہم کے دوران ادویات کی تقسیم اور عوامی بیداری سے متعلق اہم رہنمائی فراہم کی گئی۔تربیت کی صدارت کرتے ہوئے پرائمری ہیلتھ سینٹر کے انچارج میڈیکل آفیسر ڈاکٹر کفیل اختر نے کہا کہ فائیلیریا ایک سنگین بیماری ہے، جس کے خاتمے کے لیے حکومت کی جانب سے بڑے پیمانے پر ادویات کھلانے کی مہم چلائی جا رہی ہے۔ انہوں نے کہا کہ اس پروگرام کی کامیابی میں آشا کارکنوں کا کردار سب سے زیادہ اہم ہے کیونکہ یہی کارکن گھر گھر جا کر لوگوں کو دوا کھلانے اور انہیں بیماری کے خطرات سے آگاہ کرنے کا کام انجام دیتی ہیں۔ڈاکٹر کفیل اختر نے آشاؤں سے اپیل کی کہ وہ پوری ذمہ داری اور ایمانداری کے ساتھ اس مہم کو انجام دیں، تاکہ پوپری اور آس پاس کے علاقوں کو فائیلیریا جیسی بیماری سے مکمل طور پر پاک کیا جا سکے۔ انہوں نے مزید کہا کہ عوام میں اس حوالے سے بیداری پیدا کرنا بھی ضروری ہے، تاکہ لوگ دوا کھانے میں کسی قسم کی ہچکچاہٹ نہ کریں اور پروگرام کو کامیاب بنایا جا سکے۔تربیتی نشست میں شرکاء کو بتایا گیا کہ مہم کے دوران ادویات کی تقسیم کے ساتھ ساتھ لوگوں کو اس کے فوائد، ممکنہ احتیاطی تدابیر اور بیماری سے بچاؤ کے طریقوں سے بھی آگاہ کرنا ہوگا۔ تربیت میں عملی طور پر یہ بھی سمجھایا گیا کہ کن افراد کو دوا دینی ہے اور کن صورتوں میں احتیاط ضروری ہے۔اس موقع پر بی سی ایم پوجا کماری، کے ٹی ایس دیپک کمار، اکاونٹنٹ مکیش کمار، سینئر کلرک اتل کمار اور شنبھو کمار سمیت دیگر طبی عملہ بھی موجود رہا۔ تمام افسران و ملازمین نے اس مہم کو کامیاب بنانے کے لیے مکمل تعاون کا یقین دلایا۔واضح رہے کہ فائیلیریا کے خاتمے کے لیے یہ مہم 10 فروری سے علاقے میں شروع کی جا رہی ہے، جس کے تحت گھر گھر جا کر لوگوں کو ضروری ادویات فراہم کی جائیں گی تاکہ اس بیماری کا جڑ سے خاتمہ ممکن ہو سکے۔