مظفرپور:(پریس ریلیز)راشٹریہ جنتا دل کے قد آور سینیئر لیڈر اور بہار قانون ساز کونسل کے رکن قاری صہیب نے جمعرات کو بہار قانون ساز کونسل کے بجٹ اجلاس کے دوران ریاست کے قبرستانوں کی خستہ حال چہار دیواریوں کے مسئلے کو سنجیدگی سے اٹھایا۔قاری صہیب نے کونسل کےچئیرمین کو مخاطب کرتے ہوئے کہا کہ بہار میں کئی قبرستانوں کی چہار دیواریاں بہت پرانی ہونے کے باعث خستہ ہو چکی ہیں، ان کی دوبارہ تعمیر کی سخت ضرورت ہے۔بعدازاں اپنے پریس بیان میں قاری صہیب نے کہا کہ "کئی قبرستان ایسے ہیں جہاں چہار دیواری اور مٹی بھرائی کی بھی فوری ضرورت ہے۔ برسات کے موسم میں پانی لگنے کی وجہ سے لاش کی تدفین میں مشکلات پیش آتی ہیں، اور کہیں چہار دیواری نہ ہونے کی وجہ سے قبرستانوں پر غیر قانونی قبضے بھی ہو جاتے ہیں۔ اس لیے حکومت سے میرا مطالبہ ہے کہ وہ اس مسئلے پر فوری توجہ دے اور خستہ حال چہار دیواریوں کو درست کرانے کے لیے فنڈ جاری کرے۔” ذرائع ابلاغ کو خطاب کرتے ہوئے انہوں نے مزید کہا کہ نتیش مودی کی حکومت میں بہار کے کئی قبرستانوں کو کھیل کے میدان یا دیگر غیر ضروری ترقیاتی سرگرمیوں کے لیے تبدیل کرنے کی کوشش کی جارہی ہے، جو نہ صرف اخلاقی طور پر غیر مناسب ہے بلکہ قانونی طور پر بھی مکمل طور پر ممنوع ہے۔ یہ عمل نہ صرف قبرستان کی تقدس کو متاثر کرتا ہے بلکہ ان کی موجودہ حالت میں ہونے والی ضروری مرمت اور حفاظتی اقدامات کی ضرورت کو بھی نظر انداز کرتا ہے۔ حکومت کی یہ پالیسی یہ ظاہر کرتی ہے کہ وہ عوامی مسائل، خاص طور پر حساس اور مذہبی نوعیت کے امور پر، توجہ دینے کے بجائے انہیں دبانے کی کوشش کر رہی ہے، اور نمائندوں کو جو عوام کے جائز حقوق کے لیے کونسل میں آواز بلند کرتے ہیں، خاموش کروانے کی کوشش کی جا رہی ہے۔ میں اس پالیسی کی سخت مذمت کرتا ہوں اور باور کرانا چاہتا ہوں کہ عوام کے بنیادی حقوق اور ان کے ثقافتی و مذہبی ورثے کی حفاظت ہر حکومت کی ذمہ داری ہے۔قاری صہیب نے زور دیتے ہوئے کہا کہ بہار کی عوامی خدمت اور قبرستانوں کی حفاظت کو یقینی بنانے کے لیے ریاستی حکومت فوری، شفاف اور مؤثر اقدامات کرے۔ قبرستانوں کی خستہ حال چہار دیواریوں کی مرمت اور انہیں غیر قانونی قبضوں سے محفوظ رکھنے کے لیے فوری فنڈز جاری کیے جائیں، تاکہ نہ صرف موجودہ مسائل حل ہوں بلکہ آئندہ کے لیے بھی ان کی حفاظت یقینی بنائی جا سکے۔ یہ ایک عوامی ذمہ داری ہے اور حکومت کو چاہیے کہ وہ اس حساس معاملے میں کوئی تاخیر نہ کرے۔
