بہارشریف(ایم ایم عالم)ریاستی و مرکزی حج کمیٹی اور حج کمیٹی نالندہ کے نوڈل آفیسر کی ہدایت کے مطابق عازمین و عازماتِ حج 2026 کے لیے صدر ہسپتال بہارشریف میں دو روزہ ٹیکہ کاری کیمپ کا انعقاد کیا گیا۔یہ کیمپ مورخہ 11 اور 12 فروری 2026 بروز بدھ و جمعرات،صبح 10 بجے سے منعقد ہے۔حج کمیٹی آف انڈیا کی ہدایت کے مطابق اس سال تمام عازمینِ حج کے لیے یہ لازمی قرار دیا گیا ہے کہ وہ اپنے متعلقہ ضلع کے سرکاری ڈاکٹروں سے ہیلتھ چیک اپ،مینجائٹس انفلوئنزا ویکسین اور پولیو خوراک لے کر ہیلتھ سرٹیفیکیٹ حاصل کریں۔اس موقع پر مولانا محمد شاکر قاسمی،انچارج پرنسپل مدرسہ عزیزیہ بہارشریف نے ہمارے نمائندہ کو بتایا کہ امسال ضلع نالندہ سے 49 عازمین و عازمات حج فریضۂ حج کی ادائیگی کے لیے روانہ ہوں گے،جن میں 24 مرد اور 25 خواتین شامل ہیں۔انہوں نے بتایا کہ روانگی سے قبل مینجائٹس انفلوئنزا کا ٹیکہ،پولیو خوراک اور مکمل طبی جانچ کے بعد ہیلتھ سرٹیفیکیٹ کا حصول لازمی ہے۔الحمدللہ،پہلے دن 27 عازمین نے مینجائٹس انفلوئنزا کا ٹیکہ لگوا لیا۔ٹیکہ کاری کے دوران عازمین کی رہنمائی میں ماسٹر حسان اخلاقی،حماد فردوسی (مدرس، مدرسہ عزیزیہ)، ماسٹر شاداب عالم (خادم الحجاج نالندہ)۔ڈاکٹر سید مختار الحق (متولی صغریٰ وقف اسٹیٹ بہارشریف) اور مولانا محمد شاکر قاسمی نے ٹیکہ کاری پروگرام کا جائزہ بھی لیا۔عازمین کو ہدایت دی گئی ہے کہ 12 فروری کو ٹیکہ کاری کے لیے صدر ہسپتال کی نئی عمارت کے ایمرجنسی کاؤنٹر پر رجسٹریشن کروا کر چوتھی منزل،کمرہ نمبر 422 میں پہنچیں۔صدر ہسپتال کے ڈی آئی او ڈاکٹر راجندر چودھری اور ہسپتال کے تمام عملے نے اپنے فرائض بحسن و خوبی انجام دیے۔بتایا گیا کہ ہیلتھ کارڈ کی بہت اہمیت ہے،کیونکہ اس کے بغیر ایئرپورٹ میں داخلہ ممنوع ہے۔عازمین کی تعداد کے مطابق ہی بہار سرکار ویکسین کی فراہمی کرتی ہے۔جو عازمین شہر سے باہر ہیں،ان کے نمائندے آدھار کارڈ کے ساتھ صدر ہسپتال میں رپورٹ کریں اور صورتِ حال سے آگاہ کرتے ہوئے ہیلتھ کارڈ کا حصول یقینی بنائیں۔ہیلتھ سرٹیفیکیٹ دو تا تین دن کے اندر حاصل کر لینے کی ہدایت دی گئی ہے۔امید ہے کہ ٹیکہ کاری پروگرام 12 فروری کو کامیابی کے ساتھ اختتام پذیر ہوگا۔11 فروری کو عازمین حج کی صحت جانچ اور بات یہ ہے مختلف جانچوں میں ہسپتال کے ڈپٹی سپرٹنٹ ڈاکٹر راجیو رنجن اور ہیلتھ مینیجر محمد عمران احمد کی جانب سے کافی مدد کی گئی ہے جو قابل تعریف ہے۔
