کٹیہار بلقیس خاتون : ضلع میں ہولی کے تہوار کے پیش نظر محکمۂ انسدادِ شراب کی جانب سے جاری خصوصی مہم کے تحت مختلف مقامات پر چھاپہ ماری کر کے 6 افراد کو گرفتار کر لیا گیا۔ جبکہ مجموعی طور پر 154.700 لیٹر غیر ملکی شراب اور بیئر ضبط کی گئی۔ بہار بنگال سرحدی علاقے میں بلرام پور تھانہ کے تحت اُفرائل مقام پر کارروائی کرتے ہوئے شیوم کمار کو ایک موٹر سائیکل پر 17.700 لیٹر غیر ملکی شراب کے ساتھ گرفتار کیا گیا۔ اسی مقام سے محمد نسیم، محمد واحد علی اور محمد مسٹر کو ایک دوسری موٹر سائیکل پر 2.000 لیٹر بیئر کے ساتھ حراست میں لیا گیا۔ تمام گرفتار شدگان ضلع پورنیہ کے رہائشی بتائے جاتے ہیں۔اسی دوران بلرام پور تھانہ کے دھاپا پیٹرول پمپ کے قریب ایک سفید و نیلے رنگ کی بغیر نمبر والی ٹوٹو گاڑی لاوارث حالت میں ملی۔ جس کی تلاشی کے دوران 132.750 لیٹر غیر ملکی شراب برآمد کر کے ضبط کر لی گئی۔شہری علاقے میں محکمہ کی دوسری ٹیم نے معاون تھانہ کے ہوائی اڈہ علاقہ سے سندھیا دیوی کو 2.250 لیٹر غیر ملکی شراب کے ساتھ گرفتار کیا۔ جبکہ روشنا تھانہ کے تحت روشنا علاقہ سے دنیش پریہار کو دیسی (چلائی) شراب کے ساتھ پکڑا گیا۔ ادھر محکمۂ انسدادِ شراب کے حکام کے مطابق ضلعی مجسٹریٹ کے احکامات پر ہولی کے موقع پر غیر قانونی شراب کی روک تھام کے لیے مسلسل خصوصی چھاپہ ماری مہم جاری رہے گی۔
