نئی دہلی، (یو این آئی ) ہندوستانی کرکٹ ٹیم کے نوجوان بلے باز ابھیشیک شرما کی طبیعت ٹھیک ہونے کے بعد ہسپتال سے چھٹی دے دی گئی ہے۔ ابھیشیک شرما کو معدے میں انفیکشن ہونے کی وجہ سے دہلی کے ایک اسپتال میں داخل کروایا گیا تھا ،تاہم جمعرات کو نمیبیا کے خلاف ہونے والے گروپ میچ میں ان کی شرکت کا حتمی فیصلہ میچ سے کچھ دیر قبل ٹیم مینجمنٹ کرے گی۔ میچ سے ایک دن قبل پریس کانفرنس کرتے ہوئے ہندوستانی بلے باز تلک ورما نے تصدیق کی کہ ابھیشیک اب بہتر ہیں اور انہیں ہسپتال سے ڈسچارج کر دیا گیا ہے۔ تلک ورما کا کہنا تھا: ابھیشیک کو ہسپتال سے چھٹی مل گئی ہے، انہیں پیٹ میں تکلیف کی وجہ سے داخل کرایا گیا تھا۔ آج ان کی حالت کا جائزہ لینے کے بعد ہم کل فیصلہ کریں گے کہ وہ کھیلیں گے یا نہیں۔ ہمارے پاس فیصلہ کرنے کے لیے ابھی ایک دن باقی ہے۔” یاد رہے کہ ابھیشیک شرما امریکہ کے خلاف پہلے میچ میں پہلی ہی گیند پر آؤٹ ہو گئے تھے اور طبیعت ناسازی کی وجہ سے فیلڈنگ کے لیے بھی نہیں آئے تھے۔ ٹیم کے لیے دیگر مثبت خبریں یہ ہیں:پہلا میچ نہ کھیلنے والے بمراہ اب مکمل فٹ ہیں اور انہوں نے پریکٹس سیشن میں بھرپور بالنگ کی ہے۔واشنگٹن سندر بھی ٹیم کے ساتھ دوبارہ جڑ گئے ہیں۔ اگر ابھیشیک نہیں کھیلتے، تو سنجو سیمسن کو ایشان کشن کے ساتھ اننگز کا آغاز کرنے کا موقع مل سکتا ہے۔
