نئی دہلی، (یواین آئی) لوک سبھا کے اسپیکر اوم برلا منگل کو ڈھاکہ میں بنگلہ دیش نیشنلسٹ پارٹی کے سربراہ طارق رحمان کی قیادت میں بنگلہ دیش کی نو منتخب حکومت کی حلف برداری تقریب میں ہندوستان کی نمائندگی کریں گے۔ وزارتِ خارجہ نے اتوار کو ایک بیان جاری کر کے یہ اطلاع دی۔ وزارت نے کہا ہے کہ اس اہم موقع پر لوک سبھا اسپیکر کی موجودگی ہندوستان اور بنگلہ دیش کے عوام کے درمیان گہری اور مضبوط دوستی کو ظاہر کرتی ہے۔ یہ دونوں ممالک کو جوڑنے والی جمہوری اقدار کے تئیں ہندوستان کے پختہ عزم کو بھی ظاہر کرتا ہے۔ بیان میں کہا گیا ہے کہ ایک جیسے تاریخ، ثقافت اور باہمی احترام سے جڑے پڑوسیوں کے طور پر ہندوسان مسٹر رحمان کی قیادت میں بنگلہ دیش میں منتخب حکومت کا خیر مقدم کرتا ہے، جن کے وژن اور اقدار کو عوام کی بھرپور حمایت حاصل ہوئی ہے۔ قابلِ ذکر ہے کہ بنگلہ دیش میں ہوئے پارلیمانی انتخابات میں مسٹر رحمان کی قیادت میں بنگلہ دیش نیشنلسٹ پارٹی نے بھاری اکثریت سے کامیابی حاصل کی ہے۔ نئی حکومت کی حلف برداری تقریب منگل کو منعقد ہوگی۔ پارلیمانی انتخابات میں مسٹر رحمان کی پارٹی کی جیت کے بعد وزیر اعظم نریندر مودی نے مسٹر رحمان سے ٹیلی فون پر بات کر کے انہیں مبارکباد دی تھی اور یقین دہانی کرائی تھی کہ بنگلہ دیش کے عوام کی امنگوں کو پورا کرنے کی ان کی کوششوں میں ہندوستان اپنی طرف سے ہر ممکن تعاون دے گا۔ دریں اثنا بنگلہ دیش کی نئی حکومت کی تقریبِ حلف برداری میں ہندوستان کے وزیر اعظم نریندر مودی اور پاکستان کے وزیر اعظم شہباز شریف سمیت 10 سے زائد غیر ملکی نمائندوں کو مدعو کیے جانے کا امکان ہے۔ بنگلہ دیشی اخبار دی ڈیلی اسٹار نے بنگلہ دیش نیشنلسٹ پارٹی (بی این پی) اور عبوری حکومت کے ذرائع کے حوالے سے اتوار کے روز یہ اطلاع دی ہے۔ رپورٹ میں وزارتِ خارجہ کے ایک عہدیدار نے بتایا کہ عبوری حکومت نے تقریبِ حلف برداری میں چین سمیت جنوبی ایشیائی اور دیگر ایشیائی ممالک کے 12 سے زائد نمائندوں کو دعوت نامہ بھیجا ہے۔ رپورٹ میں بی این پی کے بین الاقوامی امور کے جوائنٹ جنرل سکریٹری ہمایوں کبیر کے حوالے سے کہا گیا ہے کہ بی این پی حکومت باہمی مفاد اور احترام کی بنیاد پر ہندوستان اور دیگر ممالک کے ساتھ تعلقات کو بہتر بنائے گی۔ انہوں نے مزید کہا کہ سابق وزیرِ اعظم خالدہ ضیا کی آخری رسومات میں ایس جے شنکر کی شرکت اور انتخاب کے بعد وزیر اعظم نریندر مودی کا طارق رحمان کو فون کرنا باہمی تعلقات میں بہتری کی علامت ہے۔
