لاہور،(یو این آئی )پاکستان سپر لیگ (پی ایس ایل) کی دو بار کی چیمپئن فرنچائز اسلام آباد یونائیٹڈ نے اپنی بولنگ لائن کو مزید مضبوط بنانے کے لیے زمبابوے کے قد آور فاسٹ بولر بلیسنگ مزاربانی کو اسکواڈ کا حصہ بنا لیا ہے۔ اس اہم پیش رفت سے یونائیٹڈ کے پیس اٹیک میں مزید تنوع اور جارحیت آنے کی توقع ہے۔بلیسنگ مزاربانی کو موجودہ دور کے خطرناک فاسٹ بولرز میں شمار کیا جاتا ہے۔ اپنے طویل قد کی بدولت وہ کسی بھی پچ سے اضافی باؤنس حاصل کرنے کی صلاحیت رکھتے ہیں۔ وہ مسلسل 140 کلومیٹر فی گھنٹہ سے زائد کی رفتار سے گیند بازی کرنے کی مہارت رکھتے ہیں۔مزاربانی پاور پلے میں نئی گیند کے ساتھ سوئنگ اور ڈیتھ اوورز میں یارکرز اور سلو گیندوں سے بلے بازوں کو پریشان کرتے ہیں۔یہ معاہدہ ایک ایسے وقت میں ہوا ہے جب مزاربانی جاری آئی سی سی مینز ٹی 20 ورلڈ کپ میں اپنی ٹیم کے لیے بہترین کارکردگی کا مظاہرہ کر رہے ہیں۔ ورلڈ کپ کے ہائی پریشر میچوں میں ان کی وکٹیں لینے کی صلاحیت نے پی ایس ایل فرنچائزز کی توجہ اپنی جانب مبذول کروائی۔
