ملبورن،(یواین آئی ) آسٹریلیا کی مایہ ناز آل راؤنڈر اینابیل سدرلینڈ کو مسلسل دوسرے سال ‘بیلنڈا کلارک ایوارڈ سے نوازا گیا ہے۔ یہ اعزاز آسٹریلیا میں کسی بھی خاتون کرکٹر کو دیا جانے والا سب سے بڑا سالانہ اعزاز ہے۔ سدرلینڈ نے 77 ووٹ حاصل کر کے بیتھ مونی (74 ووٹ) کو ایک قریبی مقابلے کے بعد پیچھے چھوڑ دیا۔اینابیل سدرلینڈ کے لیے یہ سال بہترین ثابت ہوا۔ انہوں نے تمام فارمیٹس میں مجموعی طور پر 15.63 کی اوسط سے 27 وکٹیں حاصل کیں اور 41.66 کی اوسط سے 250 رنز بنائے۔ ایوارڈ جیتنے کے بعد سدرلینڈ کا کہنا تھا”یہ میرے لیے ایک سرپرائز تھا، لیکن بیلنڈا کلارک جیسی لیجنڈ کے نام سے منسوب ایوارڈ جیتنا میرے لیے بڑے اعزاز کی بات ہے۔ میرا مقصد ہمیشہ ٹیم کی کامیابی میں اپنا حصہ ڈالنا ہوتا ہے۔ اب ہماری تمام تر توجہ ہندوستان کے خلاف شروع ہونے والی ٹی ٹوئنٹی سیریز پر ہے۔اینابیل سدرلینڈ کو ان کی مستقل مزاجی پر 2026 کی بہترین ون ڈے کھلاڑی قرار دیا گیا۔ٹ اسٹار بلے باز بیتھ مونی کو بہترین ٹی ٹوئنٹی کھلاڑی کے اعزاز سے نوازا گیا۔ الانا کنگ 56 ووٹوں کے ساتھ بیلنڈا کلارک ایوارڈ کی دوڑ میں تیسرے نمبر پر رہیں۔
