واشنگٹن، (یو این آئی) جنسی جرائم میں ملوث جیفری ایپسٹین کو ماضی میں پینٹاگون اور ایف بی آئی عمارتیں خریدنے کی پیشکش کی گئی تھی۔یہ انکشاف امریکی محکمہ انصاف کی جاری کردہ ای میلز کے ذریعہ ہوا ہے، جس میں کمسنوں سے جنسی جرائم کیس میں مجرم قرار دیے گئے پیڈوفائل جیفری ایپسٹین کو 2016 میں پینٹاگون سے منسلک ایک وسیع عمارت میں سرمایہ کاری کی پیشکش کی گئی تھی، تاہم اس سودے کے عملی طور پر مکمل ہونے کا کوئی ثبوت نہیں ملا۔امریکی خبر رساں ادارے فاکس نیوز کے مطابق جیفری ایپسٹین کو 2016 میں محکمہ دفاع سے وابستہ ایک بڑے تعمیراتی کمپلیکس میں حصہ خریدنے کی پیشکش کی گئی تھی۔ یہ کمپلیکس ورجینیا کے شہر آرلنگٹن میں پینٹاگون سے تقریباً ڈیڑھ کلومیٹر کے فاصلے پر واقع ہے اور اس کا رقبہ 84 ہزار 710 مربع میٹر بتایا گیا ہے۔مجوزہ خریداری کی قیمت تقریباً 116 ملین ڈالر رکھی گئی تھی۔ اس ڈھانچے کے تحت ایپسٹین شریک مالک بنتے اور عملاً امریکی حکومت کے لیے مالک مکان کی حیثیت اختیار کرلیتے۔گزشتہ ماہ شائع ہونے والی لاکھوں ای میلز میں ایک ایف بی آئی مخبر کی یادداشت بھی شامل ہے جس میں دعویٰ کیا گیا کہ ایپسٹین “موساد ایجنٹ” تھا اور اسرائیل کے لیے کام کر رہا تھا۔ یادداشت میں یہ بھی کہا گیا کہ ایپسٹین اسرائیل کے سابق وزیر اعظم ایہود باراک کے قریب تھا اور انہی کے زیر سایہ بطور جاسوس تربیت حاصل کی۔
پینٹاگون سے منسلک مجوزہ معاہدہ تین دستاویزات، ایک ای میل، سرمایہ کاروں کے لیے پریزنٹیشن اور ڈیل سمری پر مشتمل تھا، جو نئی جاری شدہ فائلوں میں شامل ہیں۔ یہ پیشکش تاجر ڈیوڈ اسٹرن نے آگے بڑھائی، جو خود کو ایپسٹین کا “سپاہی” کہتا تھا۔
اسٹرن اینڈریو ماؤنٹ بیٹن ونڈسر کے قریبی معاون بھی رہے، جنہیں حال ہی میں سرکاری عہدے کے غلط استعمال کے شبہے میں گرفتار کیا گیا۔دستاویزات کے مطابق اسٹرن نے 2015 میں ایپسٹین کو ایک علیحدہ تجویز بھی بھیجی تھی جس میں رچمنڈ اور بالٹی مور میں ایف بی آئی کے دو فیلڈ دفاتر اور عدالتوں میں سرمایہ کاری کی بات کی گئی، جنہیں “پرکشش اثاثے” قرار دیا گیا تھا۔اس منصوبے کے لیے ابتدائی طور پر ڈھائی کروڑ ڈالر اور بعد ازاں مزید آٹھ کروڑ ڈالر درکار تھے، جبکہ ملکیت کی ساخت کیمن آئی لینڈز میں قائم آف شور ادارے کے ذریعے رکھی جانی تھی۔
