دبئی میں پہلی بار کھیلنا میرے لیے اعزاز کی بات ہے: جیک ڈریپر

دبئی، (یو این آئی ) برطانوی ٹینس اسٹار جیک ڈریپر نے دبئی ڈیوٹی فری ٹینس چیمپئن شپ کے آغاز پر اپنی خوشی کا اظہار کرتے ہوئے کہا ہے کہ بچپن سے جس ٹورنامنٹ کو ٹی وی پر دیکھا، آج اس کا حصہ بننا ایک بہترین احساس ہے۔ 24 سالہ ڈریپر اس اے ٹی پی 500 ایونٹ میں چوتھے سیڈڈ کھلاڑی کے طور پر شرکت کر رہے ہیں۔گزشتہ سال وہ انجری کی وجہ سے اس ایونٹ میں شرکت نہیں کر سکے تھے، لیکن اس بار وہ مکمل طور پر تیار اور پرامید ہیں۔جیک ڈریپر، جو سابق عالمی نمبر 4 اور انڈین ویلز کے موجودہ چیمپئن ہیں، اپنی مہم کا آغاز ایک کوالیفائر یا ‘لکی لوزر کھلاڑی کے خلاف کریں گے۔ دبئی کے موسم اور ہارڈ کورٹ کے حوالے سے انہوں نے کہا”مجھے یہاں کے حالات بہت پسند ہیں۔ تاریخی طور پر ہارڈ کورٹ میری پسندیدہ سطح رہی ہے، خاص طور پر ایسے موسم میں۔ میں نے ایک ہفتہ قبل یہاں آ کر بھرپور تیاری کی ہے اور امید ہے کہ میں اس ہفتے اپنا بہترین ٹینس پیش کروں گا۔”ڈریپر نے ذکر کیا کہ جب وہ 14 سال کے تھے تو یہاں جونیئر ایونٹس کھیلنے آئے تھے، لیکن اب بطور پروفیشنل کھلاڑی وہ اس ایونٹ کی تاریخ کا حصہ بننے پر فخر محسوس کرتے ہیں۔ انہوں نے کہا کہ یہاں کے ‘پلیئر بورڈز پر ان تمام لیجنڈز کے نام موجود ہیں جنہیں وہ دیکھ کر بڑے ہوئے ہیں۔