سہرسہ (سالک کوثر امام)سہرسہ پولیس کو ایک بڑی کامیابی حاصل ہوئی ہے۔ پولیس نے 25 ہزار روپے کے انعامی اور طویل عرصے سے مفرور خطرناک مجرم راہل سنگھ کو گرفتار کر لیا ہے۔ ملزم قتل کی کوشش، لوٹ، آرمس ایکٹ اور شراب بندی قانون سمیت ایک درجن سے زائد سنگین مقدمات میں مطلوب تھا۔پولیس کے مطابق ضلع میں جرائم پر قابو پانے، مفرور اور اشتہاری مجرموں کی گرفتاری اور زیر التواء مقدمات کے جلد نمٹارے کے لیے خصوصی مہم چلائی جا رہی ہے۔ اسی سلسلے میں پولیس کو خفیہ اطلاع ملی تھی کہ مہیشی تھانہ علاقے کا رہنے والا راہل سنگھ مسلسل اپنا ٹھکانہ بدل کر گرفتاری سے بچنے کی کوشش کر رہا ہے۔معاملے کی سنگینی کو دیکھتے ہوئے پولیس سپرنٹنڈنٹ کی ہدایت پر ایک خصوصی ٹیم تشکیل دی گئی، جس میں سب ڈویژنل پولیس آفیسر صدر، ضلع انٹیلی جنس یونٹ اور مہیشی تھانہ پولیس کو شامل کیا گیا۔ ٹیم نے تکنیکی شواہد اور خفیہ معلومات کی بنیاد پر منصوبہ بند کارروائی کرتے ہوئے 23 فروری 2026 کو ملزم کو گرفتار کر لیا۔گرفتار ملزم کی شناخت راہل سنگھ ولد بھوشن سنگھ، ساکن مہپورا، تھانہ مہیشی، ضلع سہرسہ کے طور پر ہوئی ہے۔پولیس ریکارڈ کے مطابق راہل سنگھ کے خلاف قتل کی کوشش، لوٹ مار، آرمس ایکٹ اور بہار مدھ نشیذ و اُتپاد ایکٹ کے تحت کئی مقدمات درج ہیں۔ حالیہ دنوں میں بھی وہ قتل کی کوشش اور غیر قانونی اسلحہ رکھنے کے مقدمے میں مطلوب تھا۔ اس کے خلاف ضلع سہرسہ کے مختلف تھانوں میں ایک درجن سے زیادہ مقدمات درج ہیں۔پولیس نے بتایا کہ گرفتار ملزم سے مزید پوچھ گچھ کی جا رہی ہے اور قانونی کارروائی جاری ہے۔اس کارروائی میں سب ڈویژنل پولیس آفیسر آلوک کمار، سائبر تھانہ کے انچارج اجیت کمار، مہیشی تھانہ کے انچارج جینکر کمار، ضلع انٹیلی جنس یونٹ کے اہلکار اور مسلح دستہ شامل تھا۔سہرسہ پولیس نے واضح کیا ہے کہ جرائم اور مجرموں کے خلاف سخت اور مسلسل کارروائی آئندہ بھی جاری رہے گی، جبکہ مفرور اور انعامی مجرموں کی گرفتاری کے لیے خصوصی مہم مزید تیز کی جائے گی۔
