نئی دہلی، (یو این آئی) وزیر اعظم نریندر مودی ہفتے کے روز راجستھان اور گجرات کے دورے پر جائیں گے اور مختلف صحت اسکیموں اور ترقیاتی منصوبوں کا سنگ بنیاد اور افتتاح کریں گے۔ راجستھان میں وزیر اعظم 14 سالہ لڑکیوں میں سروائیکل کینسر کی روک تھام کے لیے ملک گیر ہیومن پیپیلوما وائرس (ایچ پی وی) ٹیکہ کاری مہم کا آغاز کریں گے۔ وہ اجمیر میں 16,680 کروڑ روپے سے زائد مالیت کے مختلف ترقیاتی منصوبوں کا سنگ بنیاد رکھیں گے اور افتتاح کریں گے۔ وہ راجستھان کے مختلف سرکاری محکموں اور اداروں میں نئے مقرر کیے گئے 21,800 سے زائد نوجوانوں کو تقرری نامے تقسیم کریں گے۔ اس کے بعد وزیر اعظم گجرات کے سانند میں مائیکرون ٹیکنالوجی کی سیمی کنڈکٹر اسمبلی، ٹیسٹنگ اور پیکیجنگ (اے ٹی ایم پی) یونٹ کا افتتاح کریں گے۔وزیر اعظم کے دفتر نے بتایا کہ مسٹر مودی صبح تقریباً ساڑھے گیارہ بجے اجمیر میں 16,680 کروڑ روپے سے زائد تخمینے کے مختلف ترقیاتی منصوبوں کا افتتاح اور سنگ بنیاد رکھیں گے۔ اس موقع پر وہ ایک عوامی جلسے سے بھی خطاب کریں گے۔ یہ منصوبے شہری ترقی، پینے کے پانی کی فراہمی، سڑک، آبپاشی، توانائی اور صنعتی ڈھانچے جیسے اہم شعبوں سے متعلق ہیں۔بعد ازاں احتیاطی صحت خدمات کو مضبوط بنانے اور خواتین کی فلاح و بہبود کو آگے بڑھانے کی سمت میں ایک اہم قدم کے طور پر وزیر اعظم 14 سالہ لڑکیوں کے لیے ایچ پی وی ٹیکہ کاری کی ملک گیر مہم شروع کریں گے۔ اس اقدام کا مقصد سروائیکل کینسر کی روک تھام کرنا ہے، جو خواتین میں کینسر سے متعلق بیماریوں کی بڑی وجوہات میں سے ایک ہے۔ یہ مہم ملک بھر میں لڑکیوں اور خواتین کے طویل مدتی صحت کے تحفظ کے لیے ایک اہم سنگ میل ہے۔
