نئی دہلی، (یو این آئی) کانگریس پارٹی نے لوک سبھا اسپیکر اوم برلا کے خلاف اپنی تحریک عدم اعتماد پر جاری بحث میں وزیر اعظم نریندر مودی کی غیر حاضری پر سوال اٹھاتے ہوئے کہا کہ حکومت اس میں بھی روایات اور قواعد کی خلاف ورزی کر رہی ہے۔ کانگریس میڈیا سیل کے انچارج جے رام رمیش نے بدھ کے روز یہاں ایک بیان میں کہا کہ لوک سبھا اسپیکر کو ہٹانے کی تحریک پر منگل کے روز بحث کے دوران پارلیمانی امور کے وزیر کرن رجیجو نے بڑے فخر سے دعویٰ کیا کہ بحث کے لیے 10 گھنٹے مختص کیے گئے ہيں، جب کہ دسمبر 1954 میں اسی طرح کی تحریک کے لیے صرف ڈھائی گھنٹے کا وقت دیا گیا تھا۔ انہوں نے کہا کہ مسٹر کرن رجیجو شاید یہ بتانا بھول گئے کہ 18 دسمبر 1954 کو وزیر اعظم جواہر لعل نہرو خود بحث کے دوران ایوان میں موجود تھے اور اس میں حصہ لیا تھا۔ ایوان میں تقریر کرتے ہوئے اس وقت کے وزیر اعظم پنڈت نہرو نے ڈپٹی اسپیکر سے درخواست کی تھی جو ایوان کی صدارت کر رہے تھے، اپوزیشن کو بحث کا زیادہ سے زیادہ وقت دینے کی درخواست کی تھی۔ جب یہ تحریک لوک سبھا میں پیش کی گئی تو 489 رکنی لوک سبھا میں کانگریس کے 364 ارکان تھے۔ کانگریس لیڈر نے کہا کہ اس کے بعد جب بھی اسپیکر کے خلاف عدم اعتماد کی تحریک لائی گئی اور اس پر بحث ہوئی، لوک سبھا کی صدارت ڈپٹی اسپیکر نے کی، لیکن 2019 کے وسط سے لوک سبھا میں کوئی ڈپٹی اسپیکر نہیں ہے، جو کہ آئین کی صریح خلاف ورزی ہے۔دریں اثنا پوزیشن نے بدھ کے روز لوک سبھا میں ایل پی جی کی قیمتوں میں اضافے سمیت مختلف مسائل پر ہنگامہ کیا، جس کی وجہ سے ایوان کی کارروائی دوپہر 12 بجے تک ملتوی کردی گئی۔ آج صبح جیسے ہی ایوان کی کارروائی شروع ہوئی، پریزائیڈنگ آفیسر دلیپ سائکیا نے وقفہ سوالات شروع کیا تو اپوزیشن ارکان ایوان کے وسط میں آگئے اور نعرے بازی شروع کردی۔ پریزائیڈنگ آفیسر نے اراکین سے اپیل کہ وہ پرسکون رہیں اور وقفہ سوالات جاری رہنے دیں۔ انہوں نے کہا کہ وقفہ سوالات اہم ہے اور انہیں وقفہ سوالات کے بعد موقع دیا جائے گا۔ ہنگامہ کے درمیان مرکزی وزیر اشونی وشنو نے الیکٹرانکس اور انفارمیشن ٹیکنالوجی کی وزارت اور ریلوے کی وزارت سے متعلق ضمنی سوالات کے جوابات دیئے۔
