سڈنی، (یواین آئی ) آسٹریلیا کے سابق کپتان اور کرکٹ لیجنڈ رکی پونٹنگ نے ٹی 20 ورلڈ کپ 2026 میں ہندوستان کی شاندار فتح کے بعد اسے کرکٹ کی تاریخ کی سب سے مضبوط ٹی 20 ٹیم قرار دے دیا ہے۔ احمد آباد کے نریندر مودی اسٹیڈیم میں نیوزی لینڈ کو 96 رنز سے شکست دے کر ہندوستان نہ صرف دوبارہ عالمی چیمپئن بنا بلکہ اپنی سرزمین پر ٹائٹل جیتنے والی پہلی ٹیم بھی بن گیا۔پونٹنگ کے مطابق اس بات سے انکار ممکن نہیں کہ یہ ہندوستان کا اب تک کا سب سے بہترین وائٹ بال اسکواڈ ہے۔ گزشتہ 5-6 سالوں میں آئی سی سی ایونٹس میں ان کا ریکارڈ غیر معمولی رہا ہے۔پونٹنگ نے زور دیا کہ اس ٹیم کی اصل طاقت ان کا بین الاقوامی کرکٹ اور آئی پی ایل کا وسیع تجربہ ہے۔ آئی پی ایل کے ہائی پریشر میچز نے ان کھلاڑیوں کو بڑے ٹورنامنٹس کے لیے مکمل طور پر تیار کر دیا ہے۔ٹیم میں بیٹنگ کی جارحیت اور بولنگ کے بہترین توازن نے انہیں عالمی سطح پر ناقابلِ شکست بنا دیا ہے۔ٹورنامنٹ کے دوران جنوبی افریقہ کے ہاتھوں سپر ایٹ مرحلے میں ہندوستان کو 76 رنز سے شکست کا سامنا کرنا پڑا تھا۔ پونٹنگ اس شکست کو ہندوستان کے لیے ایک مثبت موڑ سمجھتے ہیں۔ پونٹنگ کا کہنا ہے کہ مسلسل 12 میچز جیتنے کے بعد ایک برا دن آنا فطری تھا اور اچھا ہوا کہ یہ شکست فائنل سے پہلے آئی جس نے ٹیم کو دوبارہ متحد ہونے کا موقع دیا۔
