ایران اپنی دفاع کیلئے ہر ممکن قدم اٹھانے کو تیار ہے

تہران، (یواین آئی) ایران کے وزیر خارجہ عباس عراقچی نے کہا ہے کہ ایران اپنی سرزمین پر امریکہ اور اسرائیل کے ساتھ جاری جنگ کا مستقل خاتمہ چاہتا ہے اور امید ہے کہ ملک جلد ہی فتح کا جشن منائے گا۔مسٹر عراقچی نے پیر کو صحافیوں سے گفتگو میں کہا کہ ایران نے اپنے مخالفین کو کوئی پیغام نہیں بھیجا ہے اور نہ ہی جنگ بندی کی درخواست کی ہے۔ انہوں نے کہا کہ یہ تنازع اس طرح ختم ہونا چاہئے کہ مستقبل میں دشمن دوبارہ اس قسم کی جارحانہ کارروائی کرنے کی ہمت نہ کر سکیں۔انہوں نے کہا کہ ایران جنگ کا خواہاں نہیں ہے، لیکن وہ چاہتا ہے کہ موجودہ تنازع کا اختتام اس طرح ہو کہ آئندہ ایسی واقعات کے دوبارہ ہونے کا امکان ہی ختم ہو جائے۔وزیر خارجہ نے کہا کہ گزشتہ ماہ امریکہ اور اسرائیل کی جانب سے ایران کے خلاف شروع کی گئی فوجی کارروائی کے جواب میں ایران نے فوری طور پر کئی مراحل میں جوابی حملے کیے اور امریکی و اسرائیلی ٹھکانوں کو نشانہ بنایا۔انہوں نے کہا کہ گزشتہ سال بھی جب ایران کے خلاف جارحانہ کارروائی ہوئی تھی، تب مخالف فریق ایران سے بلا شرط ہتھیار ڈالنے کا مطالبہ کر رہا تھا، لیکن بعد میں انہوں نے ہی جنگ بندی کی درخواست کی تھی۔مسٹر عراقچی نے تنازع کے ابتدائی مرحلے میں ایران کے سپریم لیڈر آیت اللہ سید علی خامنہ ای کی شہادت پر اظہارِ افسوس کرتے ہوئے کہا کہ ان کی شہادت پورے قوم کے لیے وقار کی علامت ہے۔ انہوں نے اس تنازع میں کئی سینئر حکام، عام شہریوں اور بچوں کے مارے جانے کا بھی ذکر کیا۔انہوں نے کہا کہ یہ دور ملک کے لیے مشکل رہا ہے، لیکن ایران کی ثابت قدمی، دفاع اور جوابی کارروائی پورے قوم کے لیے فخر کا باعث ہے۔مسٹر عراقچی نے آبنائے ہرمز کو بند کرنے کے سوال پر کہا کہ یہ راستہ ایران کے دشمنوں اور حملہ آور ممالک کو چھوڑ کر دیگر ممالک کے لیے کھلا ہے۔ انہوں نے کہا کہ اب تک مخالف فریق کو واضح پیغام مل چکا ہے کہ ایران اپنی دفاع کے لیے ہر ممکن قدم اٹھانے کو تیار ہے اور ضرورت پڑنے پر جنگ جاری رکھے گا۔دوسری جانب، امریکہ کے صدر ڈونالڈ ٹرمپ نے آبنائے ہرمز کے بند ہونے کے پیش نظر چین، فرانس، جاپان، جنوبی کوریا، برطانیہ اور دیگر ممالک سے اس اہم سمندری راستے کی حفاظت کے لیے جنگی جہاز بھیجنے کی اپیل کی ہے۔ انہوں نے یہ بھی خبردار کیا کہ اگر اتحادی ممالک مدد نہیں کرتے تو نیٹو کے لیے مستقبل بہت خراب” ہو سکتا ہے۔میڈیا رپورٹس کے مطابق اب تک آسٹریلیا اور جاپان نے واضح کیا ہے کہ وہ فی الحال اپنے جہاز بھیجنے کا منصوبہ نہیں بنا رہے ہیں۔ برطانیہ نے کہا ہے کہ وہ اختیارات پر غور کر رہا ہے، جبکہ چین نے تنازع کو فوری طور پر ختم کرنے کی اپیل کی ہے۔ مسٹر عراقچی نے صاف کیا ہے کہ جو ممالک آبنائے ہرمز کے محفوظ استعمال کے حوالے سے بات چیت کرنا چاہتے ہیں، ایران ان کے ساتھ مذاکرات کے لیے تیار ہے۔امریکہ اور اسرائیل کی جانب سے ایران کے خلاف جنگ شروع ہونے کے بعد سے اب تک دارالحکومت تہران میں کم از کم 500 افراد ہلاک اور 5,700 زخمی ہوئے ہیں۔ ایران کے مرکزئی صوبے میں پیر کو کم از کم پانچ افراد ہلاک ہوئے، جبکہ سات دیگر زخمی ہو گئے۔ مقامی میڈیا رپورٹس کے مطابق یہ حملے مختلف مقامات پر کیے گئے۔وہیں مغربی ایشیا میں آج پیر کو بھی متحدہ عرب امارات (یو اے ای) کے فجیرہ میں ایک پٹرولیم مرکز پر ڈرون حملے کے بعد آگ لگ گئی، تاہم وقت پر قابو پا لیا گیا۔