تہران، (یو این آئی) ایرانی فورسز نے ایران کے شمال مشرقی علاقے میں جاسوسی کے الزام میں سینکڑوں افراد کو گرفتار کرلیا ہے۔غیر ملکی ذرائع ابلاغ کے مطابق ان افراد کو پاسدارانِ انقلاب کے انٹیلی جنس ادارے نے کارروائی کے دوران گرفتار کیا۔رپورٹس کے مطابق جاسوسی کے الزام میں گرفتار افراد پر حساس تنصیبات سے متعلق معلومات اکٹھی کرنے اور ممکنہ فیلڈ آپریشنز کی تیاری کا الزام ہے۔ایرانی میڈیا کے مطابق گرفتار افراد کی قومیت کے بارے میں تفصیلات جاری نہیں کی گئیں۔دوسری جانب ایران کے سپریم لیڈر مجتبیٰ خامنہ ای نے محسن رضائی کو اپنا فوجی مشیر مقرر کر دیا۔پاسداران انقلاب کے سابق کمانڈر محسن رضائی ماضی میں نائب صدر بھی رہ چکے ہیں ان کی تقرری خطے میں بڑھتی ہوئی کشیدگی کے تناظر میں اہم قرار دی جارہی ہے۔محسن رضائی نے آبنائے ہرمز کو بحری آمدو رفت کے لیے بند رکھنے کا اعلان کرتے ہوئے کہا ہے کہ کسی بھی امریکی جہاز کو خلیج فارس میں داخل نہیں ہونے دیا جائے گا۔انہوں نے دوٹوک پیغام دیا کہ خطے میں جنگ کا خاتمہ تب ہو گا جب امریکا خلیج فارس سے نکل جائے۔
