لندن ، (یو این آئی ) انگلینڈ کے مایہ ناز بلے باز جوس بٹلر نے ٹی ٹوئنٹی ورلڈ کپ کے سیمی فائنل میں ہندوستان کے ہاتھوں شکست اور اپنی مایوس کن فارم کے باوجود بین الاقوامی کرکٹ سے ریٹائرمنٹ کے امکانات کو مسترد کر دیا ہے۔ تاہم، انہوں نے تسلیم کیا ہے کہ جولائی میں ہندوستان کے خلاف ہونے والی ہوم سیریز کے لیے ٹیم میں ان کے انتخاب کی کوئی حتمی ضمانت نہیں ہے۔جوس بٹلر کے لیے حالیہ ورلڈ کپ کسی ڈراؤنے خواب سے کم ثابت نہیں ہوا، جہاں انہوں نے 8 اننگز میں محض 87 رنز اسکور کیے۔ گزشتہ چار آئی سی سی ایونٹس میں وہ صرف ایک نصف سنچری بنا سکے ہیں۔ اس کے باوجود، انگلش کرکٹ بورڈ کے ساتھ ان کا سینٹرل کنٹریکٹ ابھی 18 ماہ کے لیے باقی ہے۔اپنے پوڈ کاسٹ ‘فار دی لو آف کرکٹ میں گفتگو کرتے ہوئے بٹلر نے کہامجھے امید ہے کہ میں ٹیم کا حصہ رہوں گا۔ اگرچہ یہ ٹورنامنٹ میرے لیے بہت مایوس کن رہا، لیکن میں نے گزشتہ چند برسوں میں اپنے کیریئر کی بہترین کرکٹ کھیلی ہے اور مجھے یقین ہے کہ میں دوبارہ اپنا بہترین کھیل پیش کر سکتا ہوں۔ انگلینڈ کے لیے کھیلنے کی میری خواہش اب بھی برقرار ہے، لیکن ٹیم میں شمولیت کا فیصلہ سلیکٹرز کے ہاتھ میں ہے۔
