بہارشریف (ایم ایم عالم) شہر میں ایک پرانے قتل کیس کے ملزم کو گرفتار کرنے گئی پولیس ٹیم پر اہل خانہ نے حملہ کر دیا۔حملے میں ایک خاتون سب انسپکٹر (S I) سمیت تین پولیس اہلکار زخمی ہوئے۔تمام زخمیوں کو مقامی بہارشریف ماڈل ہسپتال میں طبی امداد دی گئی جہاں ان کی حالت خطرے سے باہر بتائی جاتی ہے۔اطلاعات کے مطابق گجرات پولیس اور بہار تھانہ کی پولیس کی ایک مشترکہ ٹیم نے بہار تھانہ کے علاقے کے ٹکولی پر علاقے میں چھاپہ مارا گیا۔یہ کارروائی 1999 میں گجرات کے سورت ضلع کے پانڈیسرا پولیس اسٹیشن میں درج ایک قتل کے مقدمہ کے سلسلے میں چلائی جا رہی تھی۔الزام ہے کہ راجیش یادو نے معمولی تنازع کے دوران اندردیو مہتو کو چاقو مار کر ہلاک کر دیا تھا اور اس کے بعد سے وہ فرار تھا۔پولیس کو خفیہ اطلاع ملی کہ ملزم راجیش یادو بہارشریف کے ٹکولی پر علاقے میں اپنے رہائش گاہ پر چھپا ہوا ہے۔اس اطلاع کی بنیاد پر ایک مشترکہ ٹیم نے رات گئے اس کے ٹھکانے پر چھاپہ مارا۔ بتایا جاتا ہے کہ جب پولیس ٹیم نے ملزم کو پکڑنے کی کوشش کی تو اس کے اہل خانہ نے احتجاج کیا اور پولیس پر حملہ کردیا۔افراتفری پھیل گئی اور حملے میں ایک خاتون ایس آئی سمیت تین پولیس اہلکار زخمی ہوئے۔واقعہ کے بعد پولیس نے فوری کارروائی کرتے ہوئے مرکزی ملزم راجیش یادو کو گرفتار کر لیا۔ساتھ ہی ساتھ پولیس پر حملے کے الزام میں اس کی بیوی،بیٹی اور بیٹے کو بھی حراست میں لے لیا گیا۔چونکہ یہ کیس ریاست گجرات سے متعلق ہے،اس لیے مقامی پولیس اور گجرات پولیس دونوں نے مزید تفصیلات بتانے سے انکار کر دیا ہے۔ذرائع کے مطابق گجرات پولیس ملزمان کو اپنے ساتھ لے کر روانہ ہو گئی ہے۔مقامی تحقیقات شروع کردی گئی ہے اور پولیس پورے معاملے کی تحقیقات کر رہی ہے۔
