اس سیزن میں سوریا ونشی اور پریانش سے امیدیں زیادہ ہوں گی: ششانک

نئی دہلی،  (یو این آئی) پنجاب کنگز کے بلے باز ششانک سنگھ کا ماننا ہے کہ نوجوان ستاروں ویبھو سوریا ونشی اور پرینش آریہ پر انڈین پریمیئر لیگ (آئی پی ایل) کے 2026 سیزن میں اپنی گزشتہ کارکردگی کو دہرانے کا اضافی دباؤ ہوگا۔آئی پی ایل 2026 کے پہلے میچ سے قبل جیو اسٹار پریس روم میں، ششانک نے کہا کہ ٹیمیں ان نوجوان بلے بازوں کے خلاف بہتر تیاری کے ساتھ اتریں گی اور ان کے کھیل میں کسی بھی تکنیکی کمی کا فائدہ اٹھانے کی کوشش کریں گی۔ششانک نے ان دونوں نوجوانوں کے بارے میں کہا کہ ’’ٹیمیں یقینی طور پر اچھی طرح سے تیار ہوں گی، اور اس سال کارکردگی دکھانے کا دباؤ ہوگا۔ توقعات زیادہ ہوں گی، جو ہندوستان میں عام بات ہے۔ سوریا ونشی ایک ابھرتا ہوا ستارہ ہے، لیکن کچھ ایسے تکنیکی پہلو ہیں جن کا فائدہ اٹھا کر ہم اسے آؤٹ کرنے کی کوشش کریں گے۔‘‘سوریا ونشی، جو اسی ہفتے 15 سال کے ہوئے ہیں، نے اپنے پہلے آئی پی ایل سیزن میں شاندار کارکردگی کا مظاہرہ کیا تھا۔ انہوں نے سات اننگز میں 206.55 کے اسٹرائیک ریٹ سے 252 رنز بنائے اور ٹی 20 کرکٹ میں سب سے کم عمر میں سنچری بنانے والے کھلاڑی بن گئے۔ آئی پی ایل کے بعد بھی ان کی شاندار فارم جاری رہی، جس میں وجے ہزارے ٹرافی میں 36 گیندوں پر سنچری اور انڈر-19 ورلڈ کپ کے فائنل میں 175 رنز کی شاندار اننگز شامل ہے۔