نئی دہلی ، (یواین ئی) وزیراعظم نریندر مودی منگل کو مہاویر جینتی کے موقع پر گجرات کے ایک روزہ دورے پر ہوں گے جہاں وہ گاندھی نگر کے کوبا تیرتھ میں سمراٹ سمپرتی میوزیم کا افتتاح کریں گے اور مختلف پروگراموں میں شرکت کریں گے۔ وزیراعظم کے دفتر سے جاری بیان کے مطابق مودی احمد آباد کے سانند میں کیئنس سیمی کون پلانٹ کا بھی افتتاح کریں گے جو انڈیا سیمی کنڈکٹر مشن کے تحت ایک بڑی کامیابی ہے۔ سمراٹ سمپرتی میوزیم جین مت کی بھرپور تاریخی اور روحانی وراثت کو ظاہر کرتا ہے جس میں سات مختلف گیلریاں قدیم نوادرات، دھاتی مجسموں، چاندی کے رتھوں اور نایاب مخطوطات کے تحفظ کے لیے وقف کی گئی ہیں۔مہاویر جین آرادھنا کیندر کے احاطے میں واقع یہ عجائب گھر (میوزیم) سات مختلف حصوں پر مشتمل ہے، جن میں سے ہر ایک ہندوستان کی تہذیبی روایات کے منفرد پہلوؤں کے لیے وقف ہے۔ یہ آنے والوں کو صدیوں پرانے علم اور ورثے کا ایک جامع سفر فراہم کرتا ہے۔ میوزیم روایتی نمائشوں کو جدید ڈیجیٹل اور آڈیو ویژول آلات کے ساتھ یکجا کرتا ہے، جس سے سیاحوں، محققین اور ماہرینِ تعلیم کے لیے ایک گہرا اور دلچسپ تجربہ تخلیق ہوتا ہے۔یہ عجائب گھر صدیوں پرانے نایاب نوادرات، جین فن پاروں اور روایتی ورثے کے مجموعوں کا تحفظ اور نمائش کرتا ہے۔ ان میں باریک بینی سے تراشے گئے پتھر اور دھات کے مجسمے، بڑے تیرتھ پٹ اور ینتر پٹ، چھوٹی پینٹنگز ، چاندی کے رتھ، سکے اور قدیم مخطوطات شامل ہیں، جنہیں سات عظیم الشان گیلریوں میں دکھایا گیا ہے۔ وسیع ہالوں میں ترتیب دیے گئے دو ہزار سے زیادہ نایاب خزانوں سے لیس یہ میوزیم زائرین کو جین مت کے ارتقاء اور اس کے گہرے ثقافتی اثرات کی مرحلہ وار سمجھ بوجھ حاصل کرنے کے قابل بناتا ہے۔وزیراعظم احمد آباد کے سانندجی آئی ڈی سی میں واقع یئنس سیمی کون پلانٹ کا بھی افتتاح کریں گے۔ اس کے ساتھ ہی اس پلانٹ میں تجارتی پیداوار کا آغاز ہوگا، جوہندوستان کے سیمی کنڈکٹر کے شعبے میں ایک اہم کامیابی ہے۔ سیمی کنڈکٹر کی تیاری جدید انٹیلیجنٹ پاور ماڈیولز (آئی پی ایم ) کی تعمیر سے ہوگی، جو آٹوموٹیو اور صنعتی استعمال کے لیے اہم اجزاء ہیں اور جنہیں کمپیکٹ، موثر اور قابل اعتماد پاور سوئچنگ سسٹم کی ضرورت ہوتی ہے۔ ہر ماڈیول 17 چپس پر مشتمل ہوتا ہے اور ان کی سپلائی کیلیفورنیا میں قائم الفا اینڈ اومیگا سیمی کنڈکٹر(اے اوایس ) کو کی جائے گی۔ پلانٹ کے تمام مراحل مکمل ہونے پر اس کی پیداواری صلاحیت 63.3 لاکھ یونٹ یومیہ ہوگی۔کیئنس سیمی کون پلانٹ کا افتتاح انڈیا سیمی کنڈکٹر مشن (آئی ایس ایم ) کے تحت ایک اہم قدم ہے۔ یہ اس پروگرام کے تحت منظور شدہ منصوبوں میں مائیکرون ٹیکنالوجی کے بعد تجارتی پیداوار شروع کرنے والی دوسری سیمی کنڈکٹر سہولت ہوگی۔ یہ منصوبہ خاص اہمیت کا حامل ہے کیونکہ اس کے تحت ہندوستان کی دوسری او ایس اے ٹی/ اے ٹی ایم پی یونٹ پیداواری مرحلے میں داخل ہو رہی ہے۔ یہ منصوبہ سیمی کنڈکٹر مینوفیکچرنگ کے شعبے میں ہندوستانی ساخت کی الیکٹرانکس مینوفیکچرنگ سروسز (ای ایم ایس ) کمپنی کے داخلے کی بھی علامت ہے، جس سے ملکی صلاحیتوں کو مزید تقویت ملے گی۔مسٹر مودی کل ہی واؤ-تھارد میں 20,000 کروڑ روپے سے زیادہ کے متعدد ترقیاتی منصوبوں کا سنگ بنیاد رکھیں گے۔
