نئی دہلی، (یو این آئی ) سن رائزرز حیدرآباد (ایس آر ایچ) کے ہاتھوں کولکتہ نائٹ رائیڈرز کی 65 رنز سے عبرتناک شکست کے بعد، لیجنڈری کرکٹر سنیل گواسکر نے کے کے آر کے ٹیم کمبینیشن پر کئی سوالات کھڑے کر دیے ہیں۔ جیو اسٹار کے پروگرام میں گفتگو کرتے ہوئے گواسکر نے خاص طور پر آسٹریلوی آل راؤنڈر کیمرون گرین کے کردار پر کڑی تنقید کی۔سنیل گواسکر کا ماننا ہے کہ اگر کیمرون گرین ٹیم کے لیے بالنگ کے جوہر نہیں دکھا رہے، تو ان کی جگہ ٹیم میں بنتی نظر نہیں آتی۔ انہوں نے کہا بالنگ نہیں کرنے والے، تو کے کے آر کو سنجیدگی سے سوچنا ہوگا۔ وہ ایک اچھے بیٹر ہیں اور آئی پی ایل میں سنچری بھی بنا چکے ہیں، لیکن حالیہ فارم ان کے ساتھ نہیں ہے۔ اگر وہ گیند سے حصہ نہیں ڈال رہے، تو ٹیم کو کسی اسپیشلسٹ بیٹر کو موقع دینا چاہیے تاکہ نمبر 5 اور 6 کی پوزیشنز کو مضبوط کیا جا سکے جہاں ٹیم فی الحال جدوجہد کر رہی ہے۔”دوسری جانب، گواسکر نے حیدرآباد کے نوجوان کھلاڑی نتیش کمار ریڈی کی بالنگ میں آنے والی بہتری کی تعریف کی۔ انہوں نے کہا کہ ریڈی اب پہلے سے زیادہ تیز رفتار اور بہتر تال کے ساتھ بالنگ کر رہے ہیں، جو ان کی فٹنس پر کی گئی محنت کا نتیجہ ہے۔ گواسکر کے مطابق، ریڈی کا اضافی اچھال حاصل کرنا بھارتی کرکٹ کے لیے ایک مثبت اشارہ ہے۔
