میوات میں سہ روزہ تبلیغی اجتماع کا آغاز آج سے

نوح،میوات،سماج نیوز سروس: میوات کے اڈبر گاوں میں کل ہفتہ سے شروع ہو رہے 3روزہ تبلیغی اجتماع میں دعوت و تبلیغ کے عالمی امیر حضرت جی مولانا محمد سعد کاندھلوی کی شرکت کو لیکر خطہ میوات کے عوام میں زبردست جوش وخروش دیکھنےکو مل رہا ہے۔گذشتہ کئی ماہ سے جاری جلسہ کی سبھی تیاریاں پوری طرح سے مکمل کر لی گئی ہیں۔واضح رہے کہ دعوت و تبلیغ کا محور کہلائے جانے والا علاقہ(ہریانہ وراجستھان) میوات میں تبلیغی جلسہ کی خوشی کسی تہوار سے کم نہیں ہوتی۔دعوت وتبلیغ کے انٹر نیشنل امیرحضرت جی مولانا محمد سعد کاندھلوی دامت برکاتہم کے قیادت میں عالمی مرکز نظام الدین دہلی سے اکابرین حضرات کی ایک پوری جماعت جس میں بزرگ عالم دین حضرت مولانا عبدالستار صاحب،مولانا محمد عمر،مولانا یوسف،مولانا الیاس جلسہ میں تشریف لا رہی ہے۔ان حضرات کی آمد کو لیکر علاقہ میں ہے انتہاء خوشی ہے۔اکابرین حضرات نہ صرف تین روز تک دعوت وتبلیغ کی اہمیت و افادیت پر مفصل بیان فرمائیں گے بلکہ میوات کے سبھی 18تبلیغی حلقوں کی کارگزاری اور آئندہ کے لیے عزائم بھی کرائیں گے۔خطہ میوات کےامیرجماعت ماسٹر محمد ہارون،نائب امیر ماسٹر محمد عرفان،حلقہ پنہانہ کے امیر ماسٹرعبدالحمید،پنگوان کے امیرماسٹرمحمدمبشر،سوہنہ کے امیر حاجی شبیر وگھاسیڑہ زون کے امیر مولانا انیس احمد نے نمائندہ کو بتایا کہ جہاں جلسہ سے راہ خدا میں نکلنے والی جماعتوں کی تشکیل کا کام ہر گاوں میں جاری ہے،وہیں جلسہ میں پیش کی جانی والی حلقہ کی کارگزاری بھی مرتب کر لی گئی ہے۔جلسہ کی تیاریوں میں مصروف ماسٹر ساجد گھاسیڑہ نے نمائندہ کو بتایا کہ جلسہ کے کامیاب انعقاد کے لئے سبھی امور جیسے وضو خانہ،پارکنگ،بیت الخلاء،پنڈال و طعام کے لئے علیحدہ علیحدہ جماعتیں تشکیل دی گئی ہیں تاکہ شرکاء کو کسی طرح کی دشواریوں کا سامنا نہ کرنا پڑے۔انہوں نے بتایا کہ جہاں باہر کی جماعتوں کے قیام کے لئے عارضی مسجد قائم کی گئی ہے وہیں حضرت جی مولانا محمد سعد کاندھلوی و دیگر اکابرین نظام الدین کے لیے قیام گاہ تیار کی گئی ہیں۔یہ عظیم الشان جلسہ 4اپریل صبح نماز فجر کے بعد شروع ہو کر 6اپریل کو اختتام پزیر ہوگا۔اجتماع میں خطہ میوات کے علاوہ ہریانہ،راجستھان،دہلی،اتر پردیش وملک کے دیگر مقامات سے کئی لاکھ لوگوں کی شرکت متوقع ہے ۔