بیجنگ، (یواین آئی) چین نے پاکستان کی جانب سے جاری سفارتی اور ثالثی کوششوں کی حمایت کا اعلان کرتے ہوئے خطے میں امن کے قیام کے لیے مذاکرات کو ناگزیر قرار دیا ہے۔چینی وزارت خارجہ کے ترجمان کے مطابق بیجنگ پاکستان سمیت دیگر ممالک کی جانب سے کشیدگی کم کرنے اور تنازعات کے حل کے لیے کیے جانے والے اقدامات کو سراہتا ہے۔ترجمان نے کہا کہ موجودہ صورتحال میں سفارتکاری اور مذاکرات ہی مسائل کا مؤثر اور پائیدار حل فراہم کر سکتے ہیں۔بیان میں پاکستان کی ثالثی کوششوں کو خطے کے استحکام کے لیے اہم قرار دیتے ہوئے کہا گیا کہ چین ان اقدامات کی مکمل حمایت کرتا ہے اور انہیں مثبت پیش رفت سمجھتا ہے۔چینی وزارت خارجہ نے عالمی برادری پر زور دیا کہ وہ کشیدگی میں کمی کے لیے مشترکہ کردار ادا کرے اور ایسے اقدامات سے گریز کرے جو صورتحال کو مزید بگاڑ سکتے ہیں۔تجزیہ کاروں کے مطابق چین کا یہ مؤقف ایسے وقت میں سامنے آیا ہے جب مشرق وسطیٰ میں بڑھتی کشیدگی کے باعث عالمی سفارتی سرگرمیوں میں اضافہ ہو رہا ہے اور مختلف ممالک جنگ بندی اور مذاکرات کے لیے متحرک ہیں۔
ایران میں ریسکیو آپریشن، موساد کی امریکی پائلٹس کی بازیابی میں شمولیت کا انکشاف
تل ابیب، 7 اپریل (یواین آئی) اسرائیل میں تعینات امریکی سفیر مائیک ہکابی نے انکشاف کیا ہے کہ ایران میں گرنے والے امریکی لڑاکا طیارے کے پائلٹس کی تلاش اور بازیابی کے آپریشن میں موساد نے اسرائیلی فوج کے ساتھ مل کر کردار ادا کیا۔مائیک ہکابی نے سوشل میڈیا پلیٹ فارم "ایکس” پر بتایا کہ انہوں نے اسرائیلی وزیرِ اعظم بنجمن نیتن یاہو سے ملاقات کی اور امریکی عوام کی جانب سے اس تعاون پر شکریہ ادا کیا۔ان کے مطابق اسرائیلی انٹیلی جنس ادارے موساد اور اسرائیلی دفاعی افواج نے ایرانی حدود میں امریکی طیارے کے عملے کو بچانے کے مشن میں نمایاں معاونت فراہم کی۔اس سے قبل عسکری جریدے "ملٹری واچ” نے رپورٹ کیا تھا کہ اس ریسکیو آپریشن کے دوران امریکہ اور اسرائیل کو مجموعی طور پر تقریباً 11 طیاروں کا نقصان اٹھانا پڑا۔یاد رہے کہ دو نشستوں والا ایف-15 ای لڑاکا طیارہ 3 اپریل کو ایران میں گر کر تباہ ہوا تھا، جس کے پائلٹ اور نیوی گیٹر پیراشوٹ کے ذریعے باہر نکلنے میں کامیاب ہو گئے تھے۔
