نئی دہلی، (یو این آئی) بھارتیہ جنتا پارٹی (بی جے پی) نے منگل کے روز کانگریس صدر ملکارجن کھرگے کے گجرات کے عوام سے متعلق مبینہ ان پڑھوالے بیان پر تیکھا حملہ کرتے ہوئے انہیں گھیرا۔بی جے پی کے سینئر لیڈر روی شنکر پرساد نے پارٹی ہیڈکوارٹر میں منعقدہ پریس کانفرنس کے دوران مسٹر کھرگے سے معافی کا مطالبہ کرتے ہوئے ان کے بیان کو نازیبا اور قابلِ اعتراض” قرار دیا۔ مسٹر پرساد نے کہا کہ کسی قومی پارٹی کے صدر کی جانب سے پوری ریاست کو "ان پڑھ” کہنا انتہائی افسوسناک بات ہے۔ انہوں نے سوال کیا کہ کیا مہاتما گاندھی، سردار ولبھ بھائی پٹیل، وکرم سارابھائی اور مورار جی دیسائی جیسی عظیم شخصیات بھی ان پڑھ تھیں؟ انہوں نے مزید کہا کہ گجرات ملک کی وہ عظیم سرزمین ہے جس نے کئی مہا پرشوں کو جنم دیا اور ملک کی تعمیر میں اہم کردار ادا کیا۔مسٹر پرساد نے کانگریس کی سابق صدر سونیا گاندھی، راہل گاندھی اور لیڈر پرینکا گاندھی واڈرا سے اس معاملے پر واضح موقف اختیار کرنے کا مطالبہ کیا۔ انہوں نے کہا کہ کانگریس کو اپنے صدر کے بیان سے لاتعلقی کا اظہار کرنا چاہیے اور معافی مانگنی چاہیے۔ مسٹر پرساد نے مسٹر کھرگے کے ایک اور بیان کا ذکر کرتے ہوئے الزام لگایا کہ اس طرح کی زبان ملک میں فرقہ وارانہ تناؤ پیدا کر سکتی ہے۔
