ننگبو، چین ( یو این آئی) بیڈمنٹن ایشیا چیمپئن شپ میں ہندوستان کے لیے جمعرات کا دن ملا جلا رہا۔ جہاں نوجوان کھلاڑی اور یو ایس اوپن 2025 کے چیمپئن آیوش شیٹی نے اپنی شاندار فارم برقرار رکھتے ہوئے کوارٹر فائنل میں جگہ بنائی، وہیں دو بار کی اولمپک میڈلسٹ پی وی سندھو اور ایچ ایس پرنائے سمیت تمام بڑے نام ٹورنامنٹ سے باہر ہو گئے۔آیوش شیٹی اس وقت ٹورنامنٹ میں واحد ہندوستانی سنگلز کھلاڑی بچے ہیں۔آیوش نے چینی تائپے کے عالمی نمبر 20 کھلاڑی چی یو جین کو محض 41 منٹ میں 21-16، 21-12 سے شکست دی۔کوارٹر فائنل میں ان کا مقابلہ انڈونیشیا کے نامور کھلاڑی اور انڈیا اوپن 2026 کے رنر اپ جوناتھن کرسٹی سے ہوگا۔ویمنز سنگلز میں پی وی سندھو کا سفر مقامی فیورٹ اور عالمی نمبر 2 وانگ زی ای کے ہاتھوں ختم ہوا۔ سندھو کو 46 منٹ تک جاری رہنے والے مقابلے میں 21-18، 21-8 سے شکست ہوئی۔ پہلے گیم میں سندھو نے 9-14 سے پیچھے ہونے کے باوجود بہترین واپسی کی اور اسکور 18-19 تک لے آئیں، لیکن دوسرے گیم میں چینی کھلاڑی نے انہیں کوئی موقع نہیں دیا۔انتی ہڈا جاپان کی توموکا میازاکی سے ہار گئیں، جس کے ساتھ ہی ویمنز سنگلز میں ہندوستانی چیلنج ختم ہو گیا۔تجربہ کار ایچ ایس پرنئے چین کے ویننگ ہونگ یانگ سے براہِ راست گیمز میں شکست کھا گئے۔مکسڈ ڈبلز میں دھرو کپیلا اور تنیشا کراسٹو ملائیشیا کی عالمی نمبر 4 جوڑی سے ہار کر باہر ہو گئے۔ویمنز ڈبلز میں پریہ کونجینگبام اور شروتی مشرا کو جاپانی جوڑی نے شکست دی، جس سے اس زمرے میں بھی ہندوستان کا سفر تمام ہوا۔
