امت شاہ نے کہا تھا کہ کیجریوال کو ہائی کورٹ سزا دے گی؛ کیا یہی ان کے اعتماد کی وجہ ہے؟:سنجے سنگھ

نئی دہلی ،سماج نیوز سروس: جب ہائی کورٹ ایکسائز پالیسی کیس میں سنٹرل بیورو آف انویسٹی گیشن (سی بی آئی) کی نظرثانی درخواست کی سماعت کر رہی ہے، ایک معروف قانونی صحافی کی رپورٹ میں انکشاف ہوا ہے کہ جسٹس سورنا کانتا شرما کے دونوں بچے مرکزی حکومت کے وکیل کے طور پر ایمپینل ہیں اور سالیسیٹر جنرل تشار مہتا کے تحت کام کرتے ہیں، جو اس معاملے میں ان کی عدالت میں پیش ہو رہے ہیں۔ عام آدمی پارٹی کے دہلی ریاستی صدر سوربھ بھاردواج نے سوشل میڈیا پلیٹ فارم ایکس پر لکھا، جسٹس سورنا کانتا شرما کے بیٹے ایشان شرما اور بیٹی شمبھوی شرما دونوں کو ستمبر اور نومبر 2025 میں مرکزی حکومت کے پینل کونسل (دہلی ہائی کورٹ اور سپریم کورٹ) کے طور پر ایمپینل کیا گیا تھا۔ یہی مرکزی حکومت (سی بی آئی کے ذریعے) جس کی نمائندگی سالیسیٹر جنرل تشار مہتا کر رہے ہیں، اروند کیجریوال اور دیگر آپ رہنماؤں کے خلاف ان کی عدالت میں پیش ہو رہی ہیں ۔انہوں نے مزید لکھا، اس طرح جسٹس سورنا کانتا شرما کے بچوں کا کیریئر سالیسیٹر جنرل تشار مہتا اور مرکزی حکومت کے ہاتھ میں ہے۔ یہی جسٹس سورنا کانتا شرما آر ایس ایس کے وکلاء ونگ کے زیر اہتمام تقریبات میں بھی شریک ہوتی ہیں۔ کیا ایسی صورتحال میں وہ جج بی جے پی کی مرکزی حکومت کے حق میں جانبدار نہیں ہوں گی جس نے ان کے بچوں کو ایمپینل کیا ہے؟ دریں اثنا، عدالتی خودمختاری پر سوال اٹھاتے ہوئے عام آدمی پارٹی کے سینئر لیڈر اور راجیہ سبھا کے رکن سنجے سنگھ نے ایکس پر کہا، جج سورنا کانتا شرما کے دونوں بچے مرکزی حکومت کے سرکاری پینل میں کام کرتے ہیں۔ انہیں مرکزی حکومت سے تنخواہ ملتی ہے اور وہ دونوں تشار مہتا کو اپنے باس کے طور پر رپورٹ کرتے ہیں۔