چنئی، ( یو این آئی)دہلی کیپیٹلز کے بلے باز نیتنش رانا کو چنئی سپر کنگز کے خلاف میچ کے دوران چوتھے امپائر کے ساتھ بدتمیزی اور نازیبا زبان استعمال کرنے پر میچ فیس کا 25 فیصد جرمانہ کر دیا گیا ہے۔ اس کے ساتھ ہی ان کے ڈسپلنری ریکارڈ میں ایک ڈی میرٹ پوائنٹ کا بھی اضافہ کیا گیا ہے۔نیتنش رانا، جو خراب فارم کی وجہ سے اس میچ میں پلیئنگ الیون کا حصہ نہیں تھے اور ڈگ آؤٹ میں بیٹھے تھے، اس وقت غصے میں آ گئے جب میدان میں موجود بلے باز ٹرسٹن اسٹبس نے دستانے تبدیل کرنے کی درخواست کی۔ امپائر انیش سہسربدھے نے اس مطالبے کو مسترد کر دیا، جس پر رانا کی امپائر کے ساتھ تلخ کلامی ہوئی۔اس وقت دہلی کیپیٹلز کو جیت کے لیے دو اوورز میں 32 رنز درکار تھے اور 60 رنز پر ناٹ آؤٹ کھیلنے والے ٹرسٹن اسٹبس ٹیم کی آخری امید تھے۔ تاہم، اسی اوور کی تیسری گیند پر اسٹبس آؤٹ ہو گئے اور دہلی کیپیٹلز کو 23 رنز سے شکست کا سامنا کرنا پڑا۔نیتنش رانا نے اپنی غلطی تسلیم کر لی ہے، جس کے بعد آئی پی ایل انتظامیہ نے ان پر جرمانہ عائد کرنے کا فیصلہ کیا۔
