لندن،( یو این آئی)انگلینڈ کے ٹیسٹ کپتان بین اسٹوکس نے ہیڈ کوچ برینڈن میکولم کے ساتھ اختلافات کی خبروں کو مسترد کرتے ہوئے واضح کیا ہے کہ وہ ایک دوسرے کے ساتھ کام کرنے کے حوالے سے مکمل پراعتماد ہیں۔ اگرچہ برطانوی میڈیا میں ایشز سیریز میں آسٹریلیا کے ہاتھوں 4-1 کی عبرتناک شکست کے بعد دونوں کے درمیان تعلقات میں کشیدگی کی رپورٹیں گردش کر رہی تھیں، لیکن اسٹوکس نے ان افواہوں کو کم اہمیت دی ہے۔انگلینڈ اینڈ ویلز کرکٹ بورڈ کو دیے گئے ایک انٹرویو میں بین اسٹوکس نے کہا ہر ایک بات پر متفق ہونا ناممکن ہے۔ ہم 95 فیصد معاملات پر ایک جیسی رائے رکھتے ہیں، لیکن باقی 5 فیصد چیزوں پر جہاں ہمارے خیالات مختلف ہوں، ہم آپس میں بات چیت کرتے ہیں اور کسی مشترکہ فیصلے پر پہنچ جاتے ہیں۔انہوں نے مزید کہا کہ ان کا اور میکولم کا اصل مقصد ایک ہی ہے، جیتنا اور ٹیم کو بہترین بنانا۔2022 میں ذمہ داریاں سنبھالنے کے بعد سے اسٹوکس اور میکولم نے ٹیسٹ کرکٹ میں انتہائی جارحانہ انداز اپنایا جسے ‘بیز بال کا نام دیا گیا۔ ایشز میں ناکامی کے بعد اس اندازِ فکر کو کڑی تنقید کا نشانہ بنایا گیا، جس کے بعد ای سی بی نے ٹیم کی تیاریوں کا تفصیلی جائزہ لیا، تاہم میکولم کو بطور کوچ برقرار رکھا گیا۔بین اسٹوکس نے مستقبل کے حوالے سے پرامید لہجے میں کہا،”ہم اس کام میں اپنی روح اور جان ڈال دیتے ہیں۔ برینڈن نے گزشتہ چار سالوں میں بہت محنت کی ہے اور مجھے امید ہے کہ ہم 2027 کے اختتام تک ساتھ رہیں گے اور وہ فتوحات حاصل کریں گے جن کی ہمیں تمنا ہے۔
