انقرہ، (یو این آئی) سفارتی ذرائع کے مطابق وزیر خارجہ حاقان فیدن نے مصر، پاکستان اور سعودی عرب کے وزرائے خارجہ کے تیسرے اجلاس کی میزبانی کی۔ذرائع نے بتایا کہ فیدان نے جمعہ کو پانچویں انطالیہ ڈپلومیسی فورم کے دائرہ کار میں یہ اجلاس منعقد کیا، تاہم مزید تفصیلات جاری نہیں کی گئیں۔ عالمی رہنما اور سینئر حکومتی عہدیدار جمعہ سے اتوار تک ترکیہ میں انطالیہ ڈپلومیسی فورم کے لیےیکجا ہوئے۔ یہ جنوبی بحیرہ روم کے شہر میں ہونے والا ایک بڑا بین الاقوامی اجلاس ہے جو اس سال عالمی غیر یقینی صورتحال کے انتظام پر مرکوز ہے۔فورم ترک صدر رجب طیب ایردوان کی سرپرستی اور وزارتِ خارجہ کی میزبانی میں منعقد ہو رہا ہے اور اس کا مرکزی خیال "مستقبل کا تعین، غیر یقینی صورتحال سے نمٹنا” ہے۔ انادولو ایجنسی فورم کی عالمی مواصلاتی شراکت دار ہے۔ اپنے ہم منصبوں کے ساتھ اجلاس کی میزبانی سے قبل، فیدان نے فورم کے شرکاء سے خطاب میں خطے میں "امن و امان کے قیام” کی اہمیت پر زور دیا اور امید ظاہر کی کہ حاصل شدہ جنگ بندی کو پائیدار امن میں تبدیل کیا جائے گا۔فیدن نے کہا: "ہماری مخلصانہ امید ہے کہ جو جنگ بندی قائم ہوئی ہے وہ مکمل طور پر نافذ کی جائے گی اور یہ عمل ایک دیرپا امن میں تبدیل ہو جائے گا۔” فیدان نے خبردار کرتے ہوئے کہا کہ دنیا بھر کو ایک دوسرے کو متحرک کرنے والے کثیرالجہتی خطرات کا سامنا ہے، غیر یقینی کی صورتحال اور بحران اب ہمارے دورکے نمایاں موضوعات بن چکے ہیں۔” گزشتہ سال کا موضوع غزہ میں جاری نسل کشی اور اس کے عالمی نتائج پر مرکوز تھا، کی طرف اشارہ کرتے ہوئے فیدان نے کہا کہ امسال کا موضوع ایران میں جنگ اور اس کے دنیا پر اثرات ہے۔ایک پاکستانی عہدیدار نے اے ایف پی نیوز ایجنسی کو بتایا کہ مذاکرات جمعہ کی شب منعقد ہوئے ہیں۔ پاکستان نے خود کو ایک اہم علاقائی ثالث کے طور پر پیش کرنے کی کوشش کی ہے، اس نے پچھلے ہفتے ایران اور امریکہ کے درمیان نایاب مذاکرات کی میزبانی کی تھی جو کسی نتیجے تک نہ پہنچ سکے تھے۔وائٹ ہاؤس نے کہا کہ اسلام آباد میں ایران کے ساتھ مزید مذاکرات "بہت ممکنہ طور پر” ہوں گے، جہاں نائب صدر جے ڈی ونس نے گزشتہ مذاکراتی دور کے دوران امریکی وفد کی قیادت کی تھی۔ امریکی صدر ڈونلڈ ٹرمپ نے اے ایف پی کو بتایا کہ ایران کے ساتھ امن معاہدے کے لیے اب "کوئی رکاوٹ باقی نہیں” ہے، اور کہا کہ کوئی معاہدہ "عنقریب” ہے۔ ٹرمپ نے ایک مختصر ٹیلیفون انٹرویو میں کہا کہ "ہم معاہدے کے بہت قریب ہیں” ۔
