لکھنؤ،سماج نیوز سروس : گزشتہ 15 اپریل کو لکھنؤکی ایک جھگی بستی میں گیس سلنڈر پھٹنے کے باعث پیش آنے والے المناک سانحے اور 300 سے زائد جھگیوں کے خاکستر ہونے پر جمعیۃ علماء اتر پردیش نے گہرے دکھ اور رنج کا اظہار کیا ہے۔ اس دلخراش واقعے کی اطلاع ملتے ہی صدر جمعیۃ علماء اترپردیش مولانا مفتی سید محمد عفان منصورپوری اور ناظم اعلیٰ مولانا امین الحق عبداللہ قاسمی کی خصوصی ہدایت و رہنمائی میں، جمعیۃ علماء اتر پردیش کے ایک اعلیٰ سطحی وفد نے ناظمِ تنظیم مفتی ظفر احمد قاسمی کی قیادت میں متاثرہ علاقے کا تفصیلی دورہ کیا اور زمینی حقائق کا جائزہ لے کر ریلیف کا کام انجام دیا۔ وفد نے موقع پر پہنچ کر دیکھا کہ آگ کی شدت اس قدر خوفناک تھی کہ دیکھتے ہی دیکھتے پورا علاقہ راکھ کے ڈھیر میں تبدیل ہو چکا ہے۔ وہاں بسنے والے 300 سے زائد غریب اور محنت کش خاندان اپنی زندگی بھر کی جمع پونجی اور روزمرہ کی تمام ضروریاتِ زندگی سے یکسر محروم اور تہی دست ہو چکے ہیں۔ مقامی لوگوں کے مطابق فائر بریگیڈ اور سرکاری انتظامی عملہ آگ بجھانے کے لیے دو گھنٹے کی تاخیر سے پہنچا، جس کے نتیجے میں نقصان کا دائرہ انتہائی وسیع ہو گیا اور سارا علاقہ جل کر خاکستر ہو گیا۔ متاثرین کی فوری داد رسی کے لیے وفد نے جمعیۃ علماء اتر پردیش کے رکن منتظمہ شفیع احمد کانپور اور دیگر مقامی ذمہ داران کے ہمراہ بڑے پیمانے پر ابتدائی راحتی کارروائیاں انجام دیں۔ فوری ضرورت کے پیش نظر متاثرین کو بچھانے کے لیے بستر اور دیگر ضروری سامان فراہم کیا گیا، نیز بڑی تعداد میں متاثرہ خاندانوں کی نقد رقوم کے ذریعے مالی اعانت بھی کی گئی۔ اس المناک سانحے پر صدر جمعیۃ علماء اتر پردیش مفتی سیدمحمد عفان منصورپوری نے اپنے گہرے رنج و غم کا اظہار کرتے ہوئے کہا کہ”آزمائش کی اس سخت گھڑی میں ہم ان مصیبت زدگان کو تنہا نہیں چھوڑ سکتے۔ انسانی ہمدردی اور اسلامی تعلیمات کا اولین تقاضا ہے کہ ہم اپنے ان بے گھر ہونے والے بھائیوں کے دکھ درد کو بانٹیں اور ان کی ہر ممکن مدد کریں۔“ ناظم اعلیٰ، مولانا امین الحق عبد اللہ قاسمی نے اپنے بیان میں تشویش کا اظہار کرتے ہوئے کہا کہ”یہ وقت عملی اقدام کا ہے۔ حکومت اور مقامی انتظامیہ کی ذمہ داری ہے کہ وہ اپنی غفلت کا ازالہ کرے اور فوری طور پر ان غریب خاندانوں کے مناسب معاوضے اور بازآبادکاری کے لیے ٹھوس اقدامات کرے۔ جمعیۃ علماء اپنے محدود وسائل کے باوجود متاثرین کی مکمل بحالی تک میدان عمل میں موجود رہے گی۔“ متاثرہ علاقے میں وفد کی قیادت کر رہے ناظم تنظیم مفتی ظفر احمد قاسمی نے اس موقع پر گفتگو کرتے ہوئے کہا کہ ”مظلومین اور مصیبت زدگان کی مدد کرنا قرب خداوندی کا بہترین وسیلہ ہے۔
