چنئی، ( یو این آئی) ہندوستان کے ابھرتے ہوئے اسکوائش کھلاڑی سورج کمار چاند اور مصر کی رقیہ عثمان نے ایچ سی ایل اسکوائش پی ایس اے چیلنجر ٹور 2026 میں بالترتیب مردوں اور خواتین کے زمرے میں خطاب اپنے نام کر لیے ہیں۔اتوار کے روز کھیلے گئے مردوں کے فائنل معرکے میں سیکنڈ سیڈ سورج کمار چاند نے شاندار کھیل کا مظاہرہ کیا۔ انہوں نے جنوبی کوریا کے آٹھویں سیڈ جیونگ من ریو کو محض 34 منٹ میں 3-0 (11-5، 11-9، 11-3) سے شکست دے کر اپنا چوتھا پی ایس اے چیلنجر ٹور خطاب جیتا۔25 سالہ ہندوستانی کھلاڑی کے لیے چنئی کا یہ ہفتہ انتہائی یادگار رہا، جہاں انہوں نے پورے ٹورنامنٹ میں ایک بھی گیم ہارے بغیر ٹرافی اپنے نام کی۔ پہلے راؤنڈ میں ‘بائی ملنے کے بعد سورج نے آریہ ویر دیوان کو ہرا کر مہم کا آغاز کیا۔ کوارٹر فائنل میں ہم وطن اوم سیموال کو شکست دی اور سیمی فائنل میں ہانگ کانگ کے وائی لوک ٹو کو چت کیا۔ یہ سورج کمار کا 2024 کے بعد پہلا بڑا ٹائٹل ہے۔ یاد رہے کہ 2024 میں انہوں نے تین ٹورنامنٹ جیتے تھے۔خواتین کے زمرے میں مصر کی ساتویں سیڈ رقیہ عثمان نے ایک سنسنی خیز مقابلے کے بعد ملائیشیا کی دوسری سیڈ ہارلین ٹین کو شکست دی۔ رقیہ نے یہ مقابلہ 3-1 (12-10، 11-7، 9-11، 11-7) سے جیت کر چیمپئن بننے کا اعزاز حاصل کیا۔
