ناظم بیگ
بلند شہر ،سماج نیوز سروس: پیر کو بلند شہر میں ریٹائرڈ ملازمین نے اپنے زیر التواء مطالبات کو لے کر کلکٹریٹ کے گیٹ پر احتجاج کیا۔ ریٹائرڈ پنشنرز اینڈ ایمپلائز یونین کے بینر تلے جمع ہوئے اور حکومت کے خلاف شدید نعرے بازی کر تے ہوئے اپنے مطالبات کو فوری پورا کرنے کا مطالبہ کیا۔مظاہرین کا کہنا تھا کہ ان کے مسائل کافی عرصے سے حل نہیں ہوئے ہیں، جس سے عدم اطمینان بڑھ رہا ہے۔ ان کے اہم مطالبات میں پنشن کے تضادات کو دور کرنا، مہنگائی الاؤنس کے فوائد کی بروقت تقسیم، بہتر طبی سہولیات اور زیر التواء واجبات کی ادائیگی شامل ہیں۔ یونین کے عہدیداروں نے بتایا کہ ریٹائرڈ ملازمین نے ساری زندگی سرکاری ملازمت میں رہتے ہوئے اپنی خدمات انجام دی ہیں لیکن ریٹائرمنٹ کے بعد ان کے مسائل کو نظر انداز کیا جارہا ہے۔ انہوں نے خبردار کیا کہ اگر ان کے مطالبات پر جلد کوئی مثبت فیصلہ نہیں کیا گیا تو تحریک کو مزید تیز کیا جائے گا۔احتجاج کے دوران ملازمین نے ہاتھوں میں بینرز اور پلے کارڈز اٹھا رکھے تھے۔ بعد ازاں انہوں نے وزیر اعلیٰ کے نام ایک میمورنڈم انتظامی افسر کو پیش کیا جس میں ان کے مطالبات کے حل پر زور دیا۔احتجاجی مظاہرے میں یونین کے کئی عہدیداران اور ممبران موجود تھے۔ کلکٹریٹ احاطے میں کچھ دیر کے لیے بدامنی کی کیفیت رہی۔ ملازمین نے واضح کیا کہ جب تک ان کے مطالبات نہیں مانے جاتے ان کی جدوجہد جاری رہے گی۔
