لوبمباشی (کانگو)، (یو این آئی) تعلیمی سرگرمیوں اور گولف کے درمیان بہترین توازن برقرار رکھنے والے منفرد کھلاڑی شوریہ بینُو افریقی سیزن میں اپنی شاندار فارم برقرار رکھے ہوئے ہیں۔ گزشتہ دو ہفتوں کے دوران ٹاپ 10 میں جگہ بنانے کے بعد اب انہوں نے ‘اے ایم گرین آئی جی پی ایل انویٹیشنل کانگو کے دوسرے راؤنڈ میں 9 انڈر 64 کا بہترین کارڈ اسکور کر کے پہلی پوزیشن حاصل کر لی ہے۔شوریہ بینُو، جو جون میں 22 سال کے ہوں گے اور کلنگا یونیورسٹی سے بی بی اے کر رہے ہیں، نے پار-73 لوبمباشی گولف کلب میں پہلے راؤنڈ میں ایک انڈر 72 کا اسکور کیا تھا۔ تاہم، دوسرے راؤنڈ میں انہوں نے دھماکہ خیز کھیل پیش کیا اور 9 انڈر کا کارڈ اسکور کر کے 36 ہولز کے بعد مجموعی طور پر 10 انڈر کا اسکور بنا لیا ہے۔ اس وقت انہیں اپنے قریبی حریفوں پر دو شاٹس کی برتری حاصل ہے۔ان کے تعاقب میں چار کھلاڑی 8 انڈر کے اسکور کے ساتھ موجود ہیں، جن میں پہلے راؤنڈ کے مشترکہ لیڈر منت برار (71-67) اور تشار پنُو (71-67) کے علاوہ گزشتہ ہفتے کے فاتح اودین مانے (68-70) اور آرین روپا آنند (67-71) شامل ہیں۔شوریہ، جن کا نام ان کے والد (جو کہ ایک فوجی افسر ہیں) نے ‘بہادر’ کے معنی پر رکھا ہے، 2023 میں پروفیشنل بننے کے بعد سے مسلسل ترقی کر رہے ہیں۔ وہ انڈین ٹور پر پہلے ہی کامیابی کا ذائقہ چکھ چکے ہیں۔ رواں سال ماریشس میں ساتویں اور جوہانسبرگ میں چوتھی پوزیشن حاصل کرنے کے بعد وہ اپنی پہلی بڑی جیت کے لیے کافی پُراعتماد نظر آ رہے ہیں۔دوسرے راؤنڈ کے آغاز میں بینُو کو پہلی برڈی حاصل کرنے میں تھوڑا وقت لگا جو انہوں نے چوتھے ہول پر اسکور کی، لیکن چھٹے ہول سے ان کے کھیل میں روانی آئی اور انہوں نے مسلسل تین برڈیز بنائیں۔ نویں ہول پر ‘ایگل اسکور کر کے وہ ہاف ٹائم تک 6 انڈر پر پہنچ گئے۔ بیک نائن پر پانچ پار کے بعد انہوں نے آخری چار میں سے تین ہولز پر برڈیز اسکور کر کے اپنے دن کا شاندار اختتام کیا۔ اگرچہ بینُو اس وقت دو شاٹس کی برتری کے ساتھ مضبوط پوزیشن میں ہیں، لیکن ان کا تعاقب کرنے والے چاروں کھلاڑی مقابلہ سخت بنا سکتے ہیں، خصوصاً اودین مانے جو مسلسل دوسری جیت کے لیے پرعزم ہیں۔
